icon_gotop
18+
autorisation
Войти | Регистрация
Время в Татышле
23:42
Четверг, 28 Марта
Рекламный баннер 990x90px top

Бызёз «Ошмес» шуре вуытозь

15:10 20.11.2014

Калыкын шуо: «Ошмес ву улыны кужым сётэ, орт­чемзэ но вуонозэ туалаен герӟа». Удмуртъёслэн «Ош­мес» газетсы но инкуазь ошмес выллем ӝутскем мыл­кыд кузьма, удмуртлыкез, сям-йылолъёсты, чебересь кырӟанъёсты, крезьгуръ­ёсты уте. 15 ар – бадӟым лыдпус ӧвӧл, озьы ке но та аръёс ӵоже уно бадӟым ужъёс быдэстэмын. 1999-тӥ арысь нырысетӥ инвожо толэзьысен «Ошмес» Башкортостанын но солэн палэназ улӥсь удмур­тъёсты огазея, эшъяськытэ.

Удмурт калыклы анай кылыныз газет поттон ся­рысь трос сюлмаськиз БР-ысь удмуртъёслэн НКЦ-енызы кивалтӥсь Ренат Биктими­рович Галямшин. Газетэ ре­дакторе юнматӥзы Андрей Васильевич Гильмаевез. Соку ӧй на вал редакция, вуиллям­тэ на вал лыдӟисьёслэн гож­тэтъёссы. Газетлэн «атаез», Андрей Васильевич, со дыре редакторлэсь но, журналист­лэсь но, корректорлэсь но ужъёссэс быдэсъяз. Тросэз гожъясьёс понна Андрей Васильевич зэмос дышетӥсь луиз, со вакытэ та удыслы нимысьтыз дышетскемъёс ӧй вал угось.

Аръёс ортчемъя, «Ошмес­лэн» вылтусыз но, пуштросэз но воштӥськизы: 2004-тӥ арын со кык тусо печате выжиз, 2009-тӥ арын А3 форматэн по­тыны кутскиз. Пӧртэм аръёсы газетэн кивалтӥзы Аркадий Миниахметов, Фёдор Бадрис­ламов. Витетӥ арзэ ни газетэн Альфид Зайноков кивалтэ.

Газетлы сӥзем ӝыт пӧртэм ёросъёсысь куноосты огазе­яз. Пумиськонэ Удмурт Эль­кунысь дуно куноос но вуизы: Кун Кенешысь Обществен­ностен но СМИ-осын кусып возёнъя управленилэн пресс-службаеныз кивалтӥсь Фёдор Миннигараев, Камсьӧр удмур­тъёслэн огазеяськонэнызы кивалтӥсь Флюра Чибышева, «Кизили» журналлэн валтӥсь редакторез Ульфат Бадрет­динов. Ӟечкыланъёсазы соос удмуртлыкез, анай кылэз азинтонын «Ошмес» газет­лэсь валтӥсь инты басьтэмзэ пусйизы. Озьы ик газетлы шуныт кылъёссэс, кузьымъ­ёссэс вуттӥзы Татышлы ёрос Кенешлэн секретарез Радик Рахимов, БР-ысь удмуртъёс­лэн НКЦ-енызы кивалтӥсьлэн Янаул ёросъя воштӥсез Юрис Саитов, НКЦ-лэн Кенешезлэн ёзчиосыз Анастасия Вожда­ева но Ханиф Баймиев, «Та­тышлинский вестник» ёрос газетлэн валтӥсь редакторез Резида Гараева, пор но чуваш кылъёсын потӥсь «Чолман» но «Урал сасси» республика газетъёсын кивалтӥсьёс Игорь Губаев но Юрий Ми­хайлов, «Нефтекамский Дом печати» ГУП-ен кивалтӥсь Ромэн Булатов, Калтасы, Татышлы, Янаул ёросъёсысь удмурт гурт поселениос­лэн администрациосынызы, школаосын, гурт хозяйство­осын но культура юртъёсын кивалтӥсьёс, удмурт кылъя дышетӥсьёс, Пермь шаерысь Куеда ёросысь Гожан, Бадӟым Гондыр, Кирга гуртъёсын, Нефтекамск городын улӥсь газетлэн матысь эшъёсыз. «Ошмес» газетлы но, уж­радэ люкаськем куноос пон­на но бадӟым кузьым луиз Свердловск улосвылысь «Урал Кенеш» огазеяськонэ пыриськись Ольга но Георгий Шамшияровъёслэн, Валентина Пантюхиналэн, Василий Аб­дуллинлэн лыктэмзы. Кузь сюресэз вакчи карыса вуэм куноос учкисьёслы шулдыр крезьгурзэс, кырӟанзэс, задор мылкыдзэс кузьмазы.

Котькуд газет лэсьтӥське лыдӟись понна. Лыдӟисьёстэк со уз улы. Дас вить ар куспын «Ошмес» трос эшъёс шедьтӥз. Гожъяськыны яратӥсьёслэн мылкыдзы калыке сюрес шедьтэ газет бамъёс пыр ӧръяськыса. Та ӝытэ «Ошмес» аслэсьтыз селькоръёссэ, юн­коръёссэ, усто иворчиоссэ, крезьгурчиоссэ пӧртэм но­минациосысь дипломъёсын но синпель кузьымъёсын пу­сйиз. Юбилей улсын ялӥськем конкурслы но йылпумъянъёс лэсьтэмын вал: «Башкир ша­ерын улӥсько, удмурт кылэн данъяськисько» конкурсын вормисьёс луизы Наталия Романова (Ижкар), Елена На­биуллина (Татышлы ёросысь Улысь Балтач гурт) но Юлия Петрокова (Татышлы ёро­сысь Ивановка гурт), «Ошме­сэн» ми котьку эш» конкурсэ азинлыко пыриськиз Данил Кабипянов (Татышлы ёросысь Бальзюга гурт).

Нокыӵе ужрад лулчебе­рет удысын тыршисьёстэк уг ортчы. Юбилей ӝытэз да­сяны но радъяны юрттӥзы Татышлы ёросысь культура ёзэтэн кивалтӥсь Салим Га­рифуллин, Выль Татышлы культура юртын ужасьёс но соин кивалтӥсь Зифина Фар­хутдинова, кырӟасьёс Алик Кайранов, Марина Низамова, Альфира Камалтдинова, Вя­зовкаысь «Уӵы ныл», Кызыл-Ярысь «Марӟан», Выль Татыш­лыысь «Шулдыр ӝыт» калык ансамбльёс, Бальзюгаысь ка­лык инструментъёсъя нылпи ансамбль но «Ошмес» коллек­тив, Улысь Балтачысь «Лож­кари» образцовой, «Ӧрӟи» но «Удмурт пиос» ансамбльёс, Калмиярысь «Италмас» ан­самбль, Уразгильдыысь трио, крезьгурен юрттӥз Александр Галиев.

Дас вить ар куспын лыдӟисьёс доры «Ошмес­лэн» огъя 800 номерез вуиз. Сое трос лыдӟо татышлыос но янаулъёс. Республикаысь тужгес кыдёкысь лыдӟисьёс Ермекей, Илиш, Кушнаренко ёросъёсын уло. Республи­камылэн палэназ – Удмурт Элькунын, Пермь шаерын, Свердловск улосвылын – улӥсь удмуртъёс но газе­тэз шумпотыса басьто. Та дыр куспын «Ошмес» трос пиналъёсты гожъяськонэн эшъяськытӥз. Ортчемзэ эске­роно ке, газетлэн ужъёсыз уно, кужымез – вормонтэм. Азьланяз но «Ошмес» мед жильыртоз, бадӟым шурлы со мед пӧрмоз.

Миляуша БУЛАТОВА.

9329

Оставить сообщение: