«Татын улэ шудэ-буре»

Алигес, кылсярысь, мон одӥг егит удмурт пиен пумиськылӥ. Со ӟуч сямен вераське.

- Тон кытысь луиськод? – тунсыкъяськисько солэсь.

- Чернушкаысь, нош анай-атае Татышлы ёросысь Кызыл-Яр гуртын будӥллям, - шуэ пияш.

- Удмурт сямен чик уд валаськы шат?

- Уг, анай-атай но куспазы ӟучен верасько.

Озьыен, анай-атай нылпи­оссылы пичиысен ик буске­льёссылэсь лулчеберетсэс, кылзэс пыӵатыса будэтӥллям. Со муген ик калыкез лыдъян-чотанын асьмелэн лыдмы арысь аре кулэсме. Нош со­бере ӝожтӥськиськом: анай кылмы, пе, быре, пиналъёсмы­лэн сое дышетыны мылкыдзы ӧвӧл. Нош кин янгыш со бор­дын? Асьмеос – анай-атайёс.

Башкортостанын удмурт пиналъёсты анай-кылзэс но сям-йылолъёссэс гажа­ны дышетон понна бадӟым ужъёс нуисько. Отын тужгес трос кужымез шӧдӥське ре­спубликаысьтымы нацио­нально-культурной центрен кивалтӥсьлэн Ренат Бикти­мирович Галямшинлэн. Чыл­как солэн тыршеменыз, ас калыкез понна «висеменыз» 1990-тӥаръёслэн пумъёсаз Башкортостанысь удмуртъёс ог-огзэс шедьтӥзы, эшъяськи­зы. Табере пӧртэм ёросъёсысь школаосын дышетскисьёс куспазы чебер удмурт кы­лын верасько. Но озьы ке но соос пӧлысь тросэз палэнэ дышетскыны кошкыса, ӟучлы пӧрмо. Сыӵе сяммы оло ка­лыкмылэсь возьдаськонэн герӟаськемын?

Туннэ асьмеос пӧртэм ка­лыкъёсын одӥг семьяын выл­лем улӥськом. Соин котьку ас­лэсьтыд анай кылдэ дунъяны но соин данъяськыны быгато­но. Котькудмы йырмес вылӥе ӝутыса «Мон-удмурт! Удмурт ӵыжы-выжыосы, удмурт мынам сямы, удмурт мынам вордскем шаере, татын улэ шудэ-буре!» шуыса вераны мед быгатомы. Медаз луэ Башкортостанын анай кылзэс ватыны малпа­сьёс. Асьмелы ас калыкедлэн нылпиез луэмдэ шӧдыны, сям-йылолъёсты, лулчеберетмес утьыны но азинтыны, мукет калыкен оградын луэмез ва­ланы тыршоно.

Нуналысь нуналэ шаера­мы мед чузъяськозы удмурт кырӟанъёс, мед пушъёзы-выльмозы сямъёс-йылолъёс, медаз безды калыкмылэн сюлэм чеберез, котьку мед улоз удмурт кылмы. Медаз вандылӥське юрт котырысь льӧмпуосмы, палэзьпуосмы, беризьёсмы, медаз куасьме жильыртӥсь кезьыт но юзмыт ошмесъёсмы. Котьку монэн ӵош мед улоз чылкыт уло­нэ, небыт музъеме, инкуазь пӧлын улӥсь удмуртлыке. Медаз чигиськы удмурт анай кылме яратонэ, вордӥськем кӧкыме гажанэ. Асьмеос ке ӧм уте, быроз удмуртлыкмы, ышоз инкуазьмылэн чеберлыкез.

Ирина КАБИПЯНОВА.

Татышлы ёросысь Баль­зюга гурт.