icon_gotop
18+
autorisation
Войти | Регистрация
Время в Татышле
09:09
Вторник, 19 Марта
Рекламный баннер 990x90px top

«Усточикар», эн лэзьы бурдъёстэ!

13:44 14.08.2014

Дас кык нунал, трос-а со? Кин ке понна со туж ичи, кин ке понна - кема но кузь кыстӥськись вакыт. «Усточикарысь» пиналъёс пӧлын но котькыӵеез вал. Нырысьсэ лыктэмъёс ӵем дыръя мӧзмылӥзы, дырын-дырын синвуаськылӥзы но. Куд-огез быгатонлыкъёссэс эскерыса пӧртэм ӧнеръёсы «тэтчазы», ас мылкыдзыя ужзэс шедьтыны выризы. Таӵе дыръя ми, ӧнерчиос, ӵемгес малпаськылӥмы: кулэ зэ­мос конкурс. Пинал мед то­доз лагерь шутэтскон пон­на гинэ ӧвӧл, ас быгатон­лыкъёстэ эскерон понна но малпамын шуыса. Со сяна, школаосысь пиналъёссэс келясь дышетӥсьёс, школаен кивалтӥсьёс но мед эскерозы, кӧня пиналзы кыӵе ӧръёсы мынэ. Шуом, одӥг школаысь лыктэм пиналъёс пӧлын ик мед луозы эстрадаез но фоль­клорез, гожъяськонэз но лэсьтӥськонэз быръемъёс.

Нуналъёс быземъя, лагерь улон ас мур кожаз «выйытӥз», пиналъёсты пӧртэм сямен эскерылӥз. Со эскеронын вал синвуаськон но шумпотон, паймон но вормон.

Нош висказы поръяз, шудӥз нылпи пальпотон. Юн­мась эшъяськон мылкыдын артэ пинал сюлэмъёсын син­маськон мылкыд но пушйылӥз. Лагерез ворсан нунал - со огшоры нунал ӧвӧл. Со орт­чем нуналъёслы, дышетскем ужъёслы йылпумъян лэсьтон. Соин ик лагере вуэм котькуд пинал, котькуд вожатой но ӧнерчи аслэсьтыз юаны кулэ: ортчем сменаын ма мон лэсь­тыны вуи, ма ӟечсэ басьтыны но сётыны быгатӥ?

Лагерез ворсан програм­маез пальпотӥсь клоун (во­жатой В. Митрофанова) но бӧрдӥсь клоун (вожатой И. Шайхуллина) усьтӥзы. Соос эстрада ӧнере ветлӥсьёсты сцена вылэ ӧтизы. Эстрада – со одӥгез яркыт но трос бы­гатэмез кулэ карись ӧнер луэ. Туэ соин кивалтӥз Удмурт Элькунысь Марина Михайло­ва. Со трос кужымзэ поныса ужаз. Соин ик пиналъёсызлэн ужъёссы но яркыт пӧрмизы. Концерт программаез узыр­мытыса сцена вылын яркыт «кизилиен» воректӥзы М. Камидуллина, А. Мингазиева, В. Агафонова, А. Садыкова, В. Мардамшина. Эшъёссы­лэсь чик бере кыльытэк усто кырӟанъёсынызы шумпоттӥзы Е. Кондратьева но Л. Бог­данова, В. Темирова но М. Зайнуллина. Выль аспӧртэм гуръёс быдэстӥзы А. Рус­ских но М. Нуриахметова. Ду­этын быдэстэм кырӟанэнызы шумпоттӥзы К. Шаймарданова но А. Рафикова, Я. Фазлыева но И. Зидымакова. Нош ӧрӟи кадь сэзь пиос Э. Шайдул­лин но Р. Гайниятов котькуд учкисьлэсь синзэ бордазы кыскыны быгатӥзы. Фольклор ӧнеръя ветлэм пиналъёс «Корка пырон» композиция возьматӥзы. Удмурт Эльку­нысь вуэм кивалтӥсьсылэн Артемий Гавриловлэн дыше­тэмез улсын пиналъёс экты­ны но, кырӟаны но дышетскил­лям. Вакчи дыр куспын дасям композицизы усто пӧрмиз. Пиналъёс тыпыр-тыпыр экто, жин-жин кырӟало. Тани фоль­клорчиос сценаез «Литерату­ра но поэзия» ӧнере ветлэм пиналъёслы сёто. Жингрес кырӟан гуръёсты, эктонъёсты ненег кылбур чуръёс вошто. Со чуръёсын нылпи дунне­ез, удмурт лагерез данъ­ян мылкыд шӧдӥське. Озьыен, пи­налъёслэн литература­ез но поэзи­ез эскерон сяна, асьсэ­лэн но кыл­бур гожты­ны мылкыд­зы ӝутскиз. Удмурт Элькунысь вуэм талан­то нылаш­лэн Евгения Леонтьева­лэн чуръёсыз тужгес усто пӧрмизы. Солэсь бере ӧз кыле М. Мухаметшина но М. Ни­гаева. Кылбуран дуннеысь азьветлӥсьёслэн дуннеязы вуттыса, сцена вылэ сэзь вамышъёсын шаплы пиналъ­ёс пото. Со – азьветлӥсьёс, кивалтӥсьсы Удмурт Эльку­нысь ӧнерчи Елена Андреева. Азьветлӥсьёс, шӧдске, дырзэс огшоры ортчытӥллямтэ. Сме­на ӵоже трос вылезлы дышет­скыны вуэм пиналъёс котькы­тын но котьку азьветлӥсьёс радэ султон сярысь сюлмась­киллям.

Пиналъёслэн пӧртэм ӧнеръёсъя тыршемзы пумы­сен йылпумъян лэсьтэм бере, сцена вылэ ёросысь спортъя но егитъёсын ужанъя ёзэтэн кивалтӥсь Н. Х. Хуснуллин потӥз. Со котькуд ӧнерчиез но лагере ужаны вуэм во­жатойёсты, лагерьлэсь кивалтӥсьсэ И. А. Гайнияро­вез тау карон гожтэтъёсын пусйиз. Пиналъёслы, вожа­тойёслы но ӧнерчиослы, ла­герьын ужасьёслы ӟечкылан кылъёсын вазиськизы БР-ысь удмуртъёслэн ИКЦ-енызы кивалтӥсь Л. З. Рахимьянова, ёросысь «Батыр» спортивной клублэн кивалтӥсез Э. Д. Валиева. Лира Закировна ла­герьлэсь кивалтӥсьсэ Иван Аллаярович Гайнияровез БР-ысь удмуртъёслэн НКЦ-зылэн тау карон гожтэтэныз пусйиз.

Нош «Ошмес» газетлэн редакторез А. Г. Зайноков котькуд отрядысь усточи пи­наллы вуоно арысь нырысетӥ паларлы«Ошмес» газетлы гожтӥськон сертификатъёс кузьмаз. Соосты басьтӥзы Е. Леонтьева, Д. Зайдуллина, П. Любимова, Ю. Кутлиярова, Д. Садыков, Э. Шайдуллин, Э. Суфиярова, В. Губаева. Ла­герь улонын тужгес яркыт «пиштэм» пиналъёс пӧлын луизы на А. Актемирова, В. Ги­мадиева, А. Ахматгараева, В. Галиахметов, М. Мухаметшина.

Таяз арын «Усточикар» лагерьлэн аслаз куншетэз кылдӥз. Нош лагерьлэсь эм­блемазэ малпаса, конкур­сын вормисе потӥз Удмурт Элькунысь азьветлӥсь пияш М. Агафонов. Озьыен, эмбле­маын луоз шунды но толэзь. Со – эшъяськон мылкыдэз возьматоз. Пужым возьматоз пиналъёслэсь кужымзэс но лагерь вӧзысь инкуазьлэсь чеберлыксэ, чагыр тылы - пи­налъёслэн лул-сюлэмъёсазы гожъяськон мылкыдлэсь вордӥськемзэ, зарни куро но кызьпу туй - нылъёслэсь но пиослэсь «зарни киосын» чебересь ужъёс пӧрмытыны быгатэмзэс. Озьы ик таяз арын «Усточикар» лагерь­мылэн гимнэз кылдӥз. Сое кылдытон бордын «эстрада», «фольклор» но «литерату­ра но поэзия» ӧнеръёсъя кивалтӥсьёс Марина Ми­хайлова, Артемий Гаврилов, Ирина Самигулова тыршизы. Озьыен, одӥгез смена нош ик йылпумъяськиз. Ӟеч лу, «Усточикар-2014», Ӟечбур, «Усточикар-2015»!

Йылпумъяса вераме потэ: арысь аре удмурт пиналъ­ёслэн лагерьзы мед сясь­каялоз, бурдъёссэ паськыт вӧлъяса азьланяз эшшо но кужмогес, эшшо но сэзьгес лобаны мед быгатоз. Нош со понна асьмелы, бадӟымъёслы, тужгес но тыршоно. Мытэм сюресэз азьланьтон понна чидан но мылкыд котьку луыны кулэ. Чебер нылпи сюреслэн пумыз ноку медаз адӟиськы шуыса, нырысь ик асьмелы,бадӟымъёслы, юн сюлмаськоно.

Ирина САМИГУЛОВА,

«Литература но поэзия» ӧнерен кивалтӥсь. 

8009

Оставить сообщение: