Пальпотэ «Усточикар», шумпотэ удмурт пинал!

«Усточикар» нылпиосты дас кыкетӥ ползэ ни пумитаз. Зэм, аръёсын лыдъяно ке, дас кык ар со туж ӧжыт на. Нош пиналъёслэсь мылкыдзэс, «Усточикарен» герӟаськем шуныт тодэ ваёнъёссэс уч­коно ке, со бадӟым но че­бер зарезьлы пӧрмоз. Таяз арын лагере сю пиналъёс люкаськизы. Соос пӧлын Удмурт Элькунысь но Пермь шаерысь, Башкортостанысь Балтач, Бурай, Калтасы, Куш­наренко, Татышлы, Янаул ёросъёсысь вуэмын. Пиналъ­ёс, шутэтскем сяна, трос визьнод люкалозы, тямыс пӧртэм ӧръёсъя быгатэмзэс эскерозы. Таяз арын пиналъ­ёс понна «Туй» (кивалтӥсез Миша Адуллин), «Зарни куро» (кивалтӥсез Снежана Гиль­мухова), «Будосъёс будэтон» (кивалтӥсез Валерия Рахи­мова), «Художественной ту­спуктэм» (кивалтӥсез Алек­сей Самирзянов), «Эстрада» (кивалтӥсез Марина Михай­лова), «Калык кырӟан гуръёс» (кивалтӥсез Артемий Гаври­лов), «Лидер» (кивалтӥсез Лена Андреева), «Литера­тура но поэзия» творческой мастерскойёс ужалозы. Нош пӧртэм ужрадъёсын шумпот­тыса, пиналъёсын ӵошен се­рекъяса-шудыса лагерь уло­нэз шулдыртозы вожатойёс Влада Митрофанова, Виталий Галиакберов, Ольга Садрет­динова, Изабелла Шайхуллина. Вожатойёсын кивалтоз Лили­ана Нуриахметова. Пиналъёс­лэсь мылкыдзэс крезьгурен шулдыртоз Радис Гайниятов. Шутэтскисьёслэн тазалыксы сярысь сюлмаськоз Светлана Мухаметзянова. Пиналъёсты спортъя ужрадъёсын шумпот­тоз Владислав Губаев. Нунал ӵоже творческой мастерской­ёсын визьнод люкаса, пӧртэм ужрадъёсын шулдыръяськись пиналъёсты ческыт пӧраса шумпоттозы пӧраськисьёс Елена Хазетдинова, Римма Гайниярова, Ольга Зарипо­ва. Нош лагерен кивалтэ Та­тышлы ёросысь Кызыл-Яр школалэн директорез Иван Гайнияров. Лагерез усьтыса, Иван Аллаярович шуиз:

- Удмурт пиналъёс «Усто­чикар» кылэн асьсэлэсь яра­тоно но кема возьмам ну­налъёссэс герӟало. Смена ортчоно вакытэ улон пӧртэм куараосын, пайдаё ужъёсын тырмемын луоз. Сӥзисько нуналъёстэс пайдаё орт­чытыны, ӟеч тодэ ваёнъёс кельтыны. Лагерьын ортчы­тэм нуналъёсты шумпотымон мед луозы, вуоно аре нош ик лыктэмды мед потоз.

Лагерез усьтонэ пырись­кыса, пиналъёсты ӟечкылаз Татышлы ёросысь спорт ко­митетэн кивалтӥсь Наси­булла Хуснуллин. Со Баш­кортостанысь Егитъёсын ужанъя кун комитетлэн ни­мыныз Фанил Нуриахмето­вез кылем арын «Усточикар» лагерен кивалтэмез понна ӟечкылаз. Нош Улысь Балтач школаысь дышетӥсь Зинаида Шарафутдинова пиналъёсы­ныз профильной лагерьёслэн фестивалязы пыриськемез понна, Тау карон гожтэтэн пусъемын. Пиналъёслы ӟеч мылкыданъёсын вазиськизы БР-ысь удмуртъёслэн НКЦ-зылэн кивалтӥсезлэн Янаул ёросъя воштӥсез Юрис Саитов но ИКЦ-лэн методистэз Лира Рахимьянова.

Тани сцена вылэ огез сьӧры мукетыз отрядъёс пото. Таяз арын пиналъёс ньыль пӧртэм отрядъёсын луозы. Со сярысь мадиз ле­генда но. Адямилы юрттыны шуыса, музъем вылэ Гон­дыръёс, Кионъёс, Лудкечъ­ёс но Ӟичыос улыны лыкто. Озьыен, ньыль отрядъёс пӧйшуръёслэсь нимъёссэс нуллозы. Ӧнерчиос но палэнэ уз кыле, «венё ӵушъялъёс» ӧжытак бышкаськизы ке но, пиналъёслы-пӧйшуръёслы юрттозы, ӵошен тупаса улозы.

Огыр-бугыр улон кутскиз. Ӟечбур, «Усточикар»-2014! Ӧръяськись нылпи кужымлы ӟеч кужым но азинскон!

Ирина САМИГУЛОВА,

«Литература но поэзия» ӧрен кивалтӥсь.