архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

      Лэсьтӥмы, быгатӥмы, вормимы

      2014.02.27 1012 0
      Лэсьтӥмы, быгатӥмы, вормимы

      Тол олимпи шудонъёсын Башкортостанысь спортсменъёс Руслан Захаров но Семён Елистратов шорт-трекын зарни медаль утӥзы. Нош Межгорьеын будэм Ольга Вилухина биатлонын кык азвесь медаль басьтӥз. Россия Федерацилэн Пре¬зидентэз В. В. Путин соосты Эшъяськон орденэн данъяз.

      «Россиысь Спортъя министр Виталий Мутко но Олимпи комитетлэн президентэз Александр Жуков уйёссэс «ческыт» кӧлыны быгато ни. Олимпиада ортчиз»,– серекъяса веразы комментаторъёс Олимпиада йылпумъяськем бере. Соин ӵош быдэс Россимы шокчиз: лэсьтӥмы, быгатӥмы, вормимы!

      Сочи. Дас сизьым нунал ӵоже Россиын улӥсь калыкъёслэн сюлэмъёсазы, быдэс дуннелэн каналъёсаз но газет-журналъёсын та городлэн нимыз улӥз. Сизьым ар ӵоже Сочи Россимылэн шорсюлмыз луиз. Татын ӝутӥськон ужъёс радъяськизы. Спорт индустрия азе бадӟым куронъёс пуктэмын вал: быдэс дуннеысь вуэм куноосты пумитаны быгатоно. Со сяна, пӧртэм ӵошатсконъёсты ортчытыны туала куронъёслы тупась спортъя объектъёс дасяно. Олимпиадалы дасяськон ужъёс кутскем дырысен, Сочи котырын трос пӧртэм вераськонъёс луизы, пӧртэм малпанъёсты кылоно вал.

      Калыклэн мылкыдыз ӵем бугыръяськыса улӥз, тросэз Олимпиадаез юнме коньдон быдтонэн лыдъязы, спор­тсменъёслэн бадӟымесь вор­монъёссылы оскисьтэмъёс но луизы. Россиысь команда, пӧртэм прогнозъёсъя, витетӥ интыын луыны кулэ вал. Соин ик, оло, олимпиадаын вормо­нэн герӟаськем малпанъёс шаерысьтымы спортэз азин­тонъя кун программае но пыртэмын ӧй вал. Со сярысь малпанэз возьматӥсь пункт ӵушемын луиз.

      Малпанъёссэс шара вераны дыртытэк, ченгешытэк, Россия ассэ кужмо шаерен возьматыны быгатоз шуыса сюлмысь оскисьёс но трос луизы. Ма, кызьы,пе, уд оскы, ас шаередлы оскон котьку луыны кулэ.

      Пӧртэм мылкыдъёсын, пӧртэм шумпотонъёсын, куддыр курыт синкылиосын тырмем Олимпиадалэн нуналъёсыз… Та вакытэ котькуд юртын, Россиысь котькуд семьяын Олимпиадаын ӝуатэм тыллэн шунытэз луиз, калыкъёслэн сюлэмъёсазы кыӵе ке но бадӟым шумпотонлы оскон кысылытэк улӥз. Ӝог ортчизы Олимпиадалэн нуналъёсыз, нырысетӥ вормонъёсты воштӥзы янгышанъёс, ыштонъёс, курыт синкылиосын но пумтэм сюлэмшугъяськонэн тырмем часъёс но минутъёс. Голъёс, очкоос, секундъёс но рекордъёс…Таослэсь но вылӥын луизы спортсменъёс понна «висисьёслэн» куараоссы, Россиысь сюлмо калыклэн шуныт, валась синъёссы. Со синъёс шумпотӥзы но бӧрдӥзы, паймизы но йыркуръяськизы, синмаськизы но оскизы. Со синъёс бурдъязы но ӝутӥзы, Олимпиадае вуэм котькуд спортсменлы кужым, вормон но оскон пыӵатӥзы. Берпуметӥ нуналъёс бадӟымесь вормонъёс ваизы: спортсменъёслэн басьтэм 33 медальзы пӧлысь 13-ез зарни, 11-ез азвесь, 9-эз бронза луиз. Олимпиадалэн кузёез-Россия – нырысетӥ интые потӥз. Тол олимпи шудонъёсын кузёос медальёсъя куинь пол вормись луиллям. Россия соос пӧлын ньылетӥез луиз.

      Россия - зэмос кузё, зэмос вормись!

      Та нуналъёсы вань дун­нелы тодмо луизы Олимпиадаысь геройёслэн нимъёссы: Юлия Липницкая, Аделина Сотникова, Татьяна Волосажар но Максим Траньков, Елена Ильиных но Никита Кацалапов. Шаермы понна выль вормонъёс ваизы Александр Зубков, Виктор Ан, Александр Смышляев, Виктор Уайлд но мукетъёс. Олимпиадалы шумпотымон йылпумъян лэсьтыса быдэс дуннее данъяськымон луизы но пьедесталлэсь вань тубатъёссэ басьтӥзы куасчиос Александр Легков, Максим Вылегжанин но Илья Черноусов.

      Таӵеез ӧй вал на! Тани со вормон! Тани со выльмись Россия! Тани со зэмос харак­тер! Россия – нырысетӥ!

      Олимпиада пумысен азьланяз но трос вераськонъёс, пумтэм кенешонъёс, йылпумъян лэсьтонъёс луозы на. Нош туннэ одӥгез валамон: ужано, кутскем ужъёсты азьлань­тоно, спорт удысэ тросгес пиналъёсты кысконо. Ӟеч лу, Сочи-2014. ӟечбур спорт удысэз кужмоятон понна выль сюреслэн выль кутсконэз. Нош Россиын улӥсь калыкъёслэсь асваланзэс юнматон понна доразы ортчись Олимпиадаын вормон котькыӵе вормонлэсь но дуногес луэ. Таӵе вормон калыкмес огазея, кужмо каре, выль ӟеч ужъёсы бурдъя, выль вормонъёслы чебер оскон сётэ.

      Ирина САМИГУЛОВА.

      Рубрики:

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить