Ивановка 1904-тӥ арын кылдэм. Нырысь татчы купец Иван Григорьевич Иванов улыны интыяськем. Со аслыз музъем басьтэм, «Искра» колхоз кылдытэм но ужасьёс утчаны кутскем. Купец доры ужаны интыяськиллям бускель Кызыл-Яр гуртын улӥсьёс. Купецлэн нимыныз ик гуртэз но нималлям.
Азьло гуртмы вӧзын кык пичи гуртъёс вылӥллям на: Гоготовка (калыке со Бердш шуыса вӧлмемын) но «Ударник» артель. Гоготовкаез купец Гоготов кылдытэм. Солэн колхозэз «Бердыш» нимаськем. Купец музъемаз кубиста, огреч, ӵуж кушман будэтэ вылэм. Трос парсь но вордэм. Солэсь адӟем карыса, удмуртъёс бакча сиён будэтонэн тунсыкъяськыны кутскиллям.
Ивановкаез кылдытэм купецез раскулачивать кариллям ке но, солэн нимыз пыраклы историе пыремын. Иван Григорьевичлэн гуртэз – со мынам но гуртэ. Мон татын вордӥськи, татын ортчиз мынам пичи дыры, татын уло мынам матысьёсы. Ивановка улэ, сяськая!
Яратоно гуртэ котырын – шаугетӥсь нюлэс. Емышъёсыныз, губиосыныз, ческыт зыно турын-куаръёсыныз со узыр. Кыӵе гинэ пӧйшуръёс, тылобурдоос отын уг пумисько! Арлэн котькыӵе вакытаз нюлэс вераны луонтэм чебер.
Толалтэ нюлэскы мон куасэн потасько. Пӧйшур пытьыосты эскерыса, чус кӧлӥсь писпуосты котыръясько. Нюлэс мыным кужым сётэ кадь.
Мукетыз данъяськымон интые – со гурт вӧзтӥ бызись Танып шуре. Милям быдэс гужеммы отын пыласькыса, чорыгаса ортче, шуыны луоз. Танып дурысь возьёсы ми турнаськыны ветлӥськом.
Мон али мусо гуртэлэсь палэнын ке но, вордскем шаере котьку сюлмам улэ. Туж мӧзмисько ульчаосылэсь, матысьёсылэсь, эшъёсылэсь, анай кыллэсь. Городысь котькуд адямилы удмурт сямен вазиськысал. Удмурт кыл быре, шуо. Нош мынам малпамъя, со ноку уз быры. Асьмеос ваньмы ӵошен кариськыса, быгатомы сое утьыны но азинтыны. Тросэз вордскем шаерзылэсь кыдёке кошкыса, анай кылме вунэтӥ шуо. Уз! Ноку уз луы вордӥськем кылдэ вунэтыны. Тынад нырысетӥ кылыд – удмурт. Со ик тонэ калыке но поттӥз.
Котькуд удмурт адями – кирпич выллем. Соослэсь ик кылдэ бадӟым удмурт корка. Одӥг адямизэ басьтӥд ке, улон инты юн уз сылы ни, нош берлогес – куашкалоз. Соин ваньмы ӵошен кариськыса, коркамес будэтыны, юнматыны тыршомы.
Юлия ПЕТРОКОВА,
Чайковскийысь медколледжын дышетскись.
Оставить сообщение: