Шулдыр крезьгур, кырӟан, эктон…

Фестивале Россия Федерацилэн вить субъектъёсысьтыз 100-лэсь ятыр куноос вуизы. Удмурт фольклорен тодматскыны, ужрадэз учкыны лыктэмъёс но трос люкаськизы. Соослы «Азвесь гур» ансамбле пыриськисьёс асьсэлэсь задор эктонъёссэс, шулдыр кырӟанъёссэс кузьмазы.

Праздникын ӟечкылан кылъёсын вазиськизы Режевск город огруглэн Культурая управлениысьтыз ӧнерчи С. К. Парфильева, Режевск город округысь Йӧскалык культурая центрен кивалтӥсь Д. Г. Мусина, Калтасы ёросысь Бадӟым Качак гуртысь культура юртэн кивалтӥсь В. Ш. Матзянов, Куеда ёросысь удмуртъёслэн национально-культурной центренызы кивалтӥсь С. И. Гадиятов. Озьы ик ӟечкылан кылзэ вуттӥз Удмурт Элькунысь Кун Кенешен кивалтӥсь Н. В. Неустроев.

Шумпотымон, котькуд фестиваль выль нимъёсты шараяны юрттэ. Туэ татчы Татарстан Республикаысь Кукмор гуртысь Зинаида Антонова вуиз. Ужрадэ нырысьсэ пыриськись кышномурт учкисьёсты аслаз кылдытэм кырӟанъёсыныз паймытӥз.

Ижевскысь «Ӟардон» фольклор ансамбль ужрадэ кыкетӥползэ пыриськиз. Ӟардонъёс «Етӥн октон» йылолэз быгатыса возьматӥзы. Удмурт Элькунысь Оркино гуртысь «Выль ӟардон» творчествоя коллективе пыриськемъёслэн кырӟанъёссы крезь гур улсын чузъяськизы. Коллективен кивалтӥсьлэн Нина Романовалэн кылъёсызъя, ужрадэз дасясьёс соосты, азьвыл тодмооссэс выллем, туж шуныт пумитазы.

Фестивале, котьку сямен, УР-ысь Покчи Пурга ёросысь Екатерина Антонова но вуиз. Азьло со «Покчи арганчи» ансамблез возьматӥз ке вал, туэ со ужрадэ гармоникаен усто шудӥсь Диана Павловаез ваиз. Е. Антонова бадӟым ужрадэ бускельёссэ – Улысь Юриысь «Инвожо» фольклор ансамблез – но вазиз. Нина Алексан­дроваен кивалтоно ансамбль удмурт такмакъёс кузьмаз.

Огез бӧрьсы мукетыз, яркыт дӥськутъёсын, потазы сцена вылэ коллективъёс: Тюменьысь «Оскон», Бадӟым Качакысь «Зангари», Пермь шаерысь «Пинал сюлэм» но «Инвожо», Дегтярскысь «Италмас», Реж городысь «Тюрагай», Первомайскысь но Дружининоысь «Инвожо», Стриганск гуртысь «Ошмес», Екатеринбургысь «Азвесь гур» но «Чингыли» фольклор ансамбльёс. Сысертьысь Мария Даутовалэн камсьӧр кырӟанъёсыз котькинлэн сюлмаз сюрес шедьтыны быгатӥзы.

Удмуртъёс - сыӵе калык, соос нокыӵе ужрадэ но кузьымъёстэк уг вуо. Фестивальын азвесь гуръёслы – юбиляръёслы - удалтӥз. Котькуд коллектив соослы аспӧртэм кузьымъёс ваиз.

Фестиваль кема ке но кыстӥськиз, ужрадэ пыриськемъёслэн синъёссы яркыт кизилиос выллем ӝуазы. Уго фестиваль тодматэ, герӟа, эшъёс кузьма но выль ужъёслы бурдъя. Оскисько, ужрад улоз, вуоноын но радъяськоз, сяськаялоз.

Марина ЯГУТКИНА.

Удмуртъёслэн «Эгес» огазеяськонэнызы кивалтӥсь.