icon_gotop
18+
autorisation
Войти | Регистрация
Время в Татышле
06:30
Пятница, 29 Марта
Рекламный баннер 990x90px top

Янгышан пыраклы улонэн люке

09:32 26.09.2013

Нош туннэ нуналэ машина шудон интыын, шуыны луоз. Юртлы быдэ одӥг ӧвӧл, кык-куинь машина лыдъ­яське. Пичиез но, бадӟымез но руль сьӧры пуксьыны дырто. Корт «валэн» ворттылон понна удостоверение, сю­рес вылын ветлонъя огъя куронъёс сярысь малпасез ик туж ӧжыт кадь. Курытсэ веръямзы бере руль сьӧры пуксьыны мылкыд карисьёслэн но лыдзы кышкатэ. «Сыӵеосын» сэрен ик трос дыръя нокыӵе янгыш лэсь­тымтэ адямиослэн улонзы чигиське.

Статистикалэн лыдпусъёсызъя, туэ ӝыны ар куспын Россия Федера­циын 83 439 ДТП луэм. Отын 10 364 адями бырыны шедем, 106 531 адями сӧсырмем. 2011-тӥ арысь нырысетӥ паларен ӵошатоно ке, лыдпусъёс трослы вылӥын луо. Сюрес вылын луэм шудтэм учыръёслэн йылэмзы машинаослэн, водительёслэн йы­лэменызы но герӟаськемын, дыр. Но таӵе валэктонэн гинэ буйгатскыны уг луы. Руль сьӧры пуксьыса сюрес вылэ потӥсь адями котьку куронъ­ёсты быдэстон, сюрес вылын янгыш лэсьтонтэм сярысь малпаськыны кулэ.

Одӥг ӝытэ ёросысь сюрес дуре интыяськем вузкарон юртэ пырыны муг шедиз. Магазин вӧзы люкаськем скутер шуон макеос соку ик син шоры йӧтӥзы. Вузкарон юрт егитъёсын тырмем. Ваньзы соос кык литръем «баллонъёс» басьтыны дырто. Вузка­рись дыр шоры но уг учкы, лэся. Час кемалась дас кык пала кошкемын ке но, со егитъёслы сур ӵектыса, тросгес коньдон пыртон сярысь сюл­маське. Нош егит пиос? Тодмо ини, басьтэм сурзэс соос доразы бертыса уг юо. Одно ик усыкмыса руль сьӧры интыясько.

Кема ӧвӧл анай-атайёслы радъям вераськон-кенешонын одӥг школа­лэн директорез шуиз: нылпиостылэн кышкыт учыръёсы шедемзылы трос дыръя асьтэос, пе, янгыш луисько­ды. Уго пичиысен пиналдылы дуно кузьымъёс басьтон сярысь сюл­маськиськоды. Аръёс ортчемъя пи­налъёслэн куронъёссы йыло шуыса малпаськыны ик уд вуиське.

Озьы ик вань, лэся. Алигес одӥг тодмое куинетӥклассэз йылпумъям пиезлы мопед басьтэм. Ӝутыса вор­монтэм корт «эшез» вылэ интыяськы­куз, пичи мугоро пияшлэн пыдъёсыз музъеме но уг шедё. Сюрес вылын витьымтэ шорысь кылдэм югдуре шедёно ке луиз, пияш мопедэз улэ ик кылёз. Уг быгаты меда вал атаймурт та выллем кузьым басьтонэн кӧня ке арлы ӝегатскыны? Кызьы тодмо, покчи классын дышетскисьёслы руль сьӧры пуксьыса «лобаны» луон­лыкъёс чакламын ӧвӧл на. Федерал законлэн «О безопасности дорожно­го движения» статьяезъя, мопедэн (скутерен) 14 арессэ тырмем адями гинэ ворттылыны быгатэ. Нош мо­тоциклэн ветлон понна нимысьтыз «А» категориен удостоверение кулэ, кудзэ 16 арессэ тырмем адямилэн гинэ басьтыны луонлыкъёсыз вань.

Кыкетӥез тодмое полициын ужа. Дорожно-патрульной службаын ужа­сьёсты со «асламъёс» нима. Соин, вылды, курытсэ веръякуз но руль сьӧраз кышкатэк пуксе. Трос дыръя со машиназэ укмысэтӥклассын дышетскись пиезлы но оске. Пияш ӵемысь ӝытъёсы гуртэ песяй-песя­тайёсыз, ӵужаез доры вуылэ. Эшъёссэ пуктыса, гурт ульчаостӥ«лоба».

«Сыӵеос», «асламъёс» вылын воз­иське, лэся, туала улон. Озьы ке но одӥг йыртэмасен сэрен янгышасьтэм адямиослэн улонзы медаз чигиськы вылэм. Уго улон нокинлы кык пол уг сётӥськы.

Миляуша НИГАМАТУЛЛИНА.

6632

Оставить сообщение: