icon_gotop
18+
autorisation
Войти | Регистрация
Время в Татышле
10:05
Пятница, 29 Марта
Рекламный баннер 990x90px top

Секыт ужын юнмам кузпалъёс

08:16 27.09.2013

Бен, олокыӵе дыръёссы но вал соослэн. Сютэм, секыт аръёссы, колхозын но мукет пӧртэм интыосын ужаса вет­лэм дыръёссы, аръёс орт­чемъя кыдёке ке но кылё, уг вуно, ялан тодазы лыкто.

- Сютэм ветлэм дыръ­ёс трос луизы, пуньыен гинэ пызь сётъязы, кушманэн кӧтэз тырем дыръёс но луизы. Ыж фермае ужаны интыяськи но, ыжъёсты кыскыса, куддыр йӧлзэс юисько вал. Ужамтэ уже, вуылымтэ интыосы ӧз кыле. Секытэсь мешокъёсты ӝуткаса ужай, кужым уг тырмы шуыса вераны уг дӥсьтӥськы вал. Ми ужан аръёсы улон му­кет вал, адями возьдаськись луиз, пумит вазьылыны ӧз быгаты. Мае косӥзы, кытчы мы­ныны куризы, ваньзэ лэсьтӥмы, сюлмысь ужамы. Али пиналъ­ёс шудоесь, соослы сютэм улонэз адӟыны медаз гожты. Тодам на, дас сизьым аресам Октябрьский городэз ӝутыны ветлӥмы. Школаын куать клас­созь гинэ дышетски, азьвыл дышетскыны дыр ӧй вал, нылы, - нюромем синъёссэ ӵушылыса вера песянай.

Вераськонамы Валинур песятай но пыриське. Солэн но синвуосыз быльырско. Ортчем улонэз син азяз пуксе, шӧдске. Солы но улон капчиен сёт­скымтэ. Арлыдоосын верась­кон котьку сюлэмез бугыртэ, песятайлэсь тодэ-ваёнъёссэ сак кылзӥсько.

- Монэ 1949-тӥарын ФЗО-е дышетскыны ыстӥзы. 1951-тӥарысен тракторен ужаны кутски. Секыт вал, ӟырт ке­зьыт куазен но, пӧсь пыжись шунды улын но, зоро-кото нуналъёсын но бусыын тырши. Бригадир но луи, вань улон сюресме колхозэн герӟай. Азьвыл колхозын ужась туж­гес дано ужасен лыдъяськиз. Механизаторъёс но данъясь­кымон адямиос вал, калык шулдыр, огкылысь ужаса улӥз. Гыриськытэк, кизиськытэк кылем бусыос ӧй вал. Музъем бордын ужай бере, али ке но гурт котырысь ужъёс понна сюлмы висе на. Гуртъёсмы, бусыосмы, кузётэм медаз луэ вал, нылпиосмы, внукъёсмы гурт удысын ужанэз азьлань­тыны мед быгатысалзы. Али техника азьвыллэсь трослы кужмогес, туала пиналъёс го­льык киын кезьыт кортэз ку­тыса уз ужалэ ни. Тракторъёс, комбайнъёс но шунытэсь, вы­лесь, ужаны мылкыд гинэ мед луоз, - вера Валинур Фаюршин.

Улытозязы Мензифа песя­наен Валинур песятай куинь юрт пуктыны вуизы, ньыль пиналъёссэс будэтӥзы, ныл­пиоссэс паръяса, котькудзы­лы сюан ортчытӥзы. Али соос Фирдус пиезлэн семьяеныз уло, укмыс внукъёссылы гажа­мон ӵужанай но ӵужатай, песя­най но песятай луо. Кузпалъ­ёс али ке но юрт котыразы бергало. Азьланяз но соослы тазалык но капчи пересьмон нуналъёс сӥзем потэ.

Ирина ХУЗИАХМЕТОВА.

Бурай ёрос.

3838

Оставить сообщение: