Вашкалазэ выльысь берыктӥзы

Та нуналэ «Космос» кинокон­цертной театр азьын национально-культурной огазеяськонъёс калык коркаосты возьматӥзы. Башкиръ­ёслэн, удмуртъёслэн, поръёслэн, армянъёслэн, азербайджанъёслэн, кореецъёслэн, таджикъёслэн но мукет калыкъёслэн культураенызы, сям-йылолъёсынызы тодматскон котькинлы тунсыко потӥз.

«Космослэн» бадӟым залаз шул­дыр концерт ортчиз. Отчы профес­сионал коллективъёс но Азербайд­жанысь, Башкортостанысь, Узбеки­станысь но Свердловск улосвылысь тодмо кырӟасьёс пыриськизы. Бело­руссиысь «Песняры» ансамбльлэн ужрадэ вуылэмез бадӟым кузьым луиз. Творческой коллективез кылдытӥсьлы А. Мулявинлы памят­ник пуктыны нырысетӥвамыш но та нуналэ лэсьтӥськиз: нырысетӥиз понэмын. Одӥг ар куспын «Космос» вӧзысь гуждорын Мулявинлы памят­ник «ӝужалоз».

Ужрадын удмурт калык сямйылолъёсты «Эгес» национально-культурной улосвыл огазеяськон быгатыса возьматӥз. Екатерин­бургысь «Азвесь гур» фольклор ансамбль удмурт азбарез возь­матон сярысь сюлмаськиз. Ужазы соос вашкала арбериосты паськыт кутӥзы. Куэм выж валетъёс, удмурт дӥськутъёс, пужыятэм ӵушконъёс но ӝӧккышетъёс, ужан тӥрлыкъёс но ческытэсь пӧръёс котькинэ удмур­тъёслэн азьвыл улоназы кыскизы. Вице-губернаторез Я. П. Силинэз, Внутренней политикая департа­ментысь валтӥсь консультантэз М. Ю. Плясуноваез, Свердловск улос­вылысь культурая министрез П. В. Крековез удмурт азбарын турыно ческыт чаен, перепечен но табанен куноязы.

Бадӟым концертэ Реж городысь «Тюрагай» фольклор ансамблысь кырӟась Серафима Передерина но пыриськиз. Улосвыл фестивальёс­лэн но калыккуспо конкурсъёслэн лауреатсы учкисьёслы «Вамыштоме артэ» кырӟанзэ кузьмаз.

Калыкъёслэн праздниказы Ека­теринбург, Реж, Ревда но Сысерть го­родъёсысь удмурт огазеяськонъёс но мыло-кыдо пыриськизы. Кык сюрс­лэсь ятыр куноос бадӟым ужрадын удмурт культураен тодматскизы.

Марина ЯГУТКИНА, удмуртъёслэн «Эгес» национально-культурной огазеяськонэнызы кивалтӥсь.