архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

      Трос кужмо куасчиосты будэтӥз

      2017.03.23 589 0
      Трос кужмо куасчиосты будэтӥз

      Вениамин Набиокович Набиоков – Татышлы ёросысь Вязовка гуртлэн дано адямиез. Ёросын со усто куасчи, быгатӥсь тренер луэменыз тодмо, «Отличник народного просвещения РСФСР» нимен пусъемын. Куамын арлэсь кема физрук луыса ужам дышетӥсьлэн (соос пӧлысь кызьзэ Бигинее ветлыса ужам) пиналъёсыз ёросын чемпион нимлы кузё луылӥллям, командаез котькуд ёрос ӵошатсконысь вормонэн берытскем. Тросэз, дышетӥсьсылэсь адӟем карыса, физкультурая дышетӥсьлэсь ужзэ бырйиллям. Кылсярысь, Александр Сабанчин, Яков Бадамшин, Руслан Нуриахметов, Александр Фаршатов но мукетъёс.

      Александр Иванович Сабанчин дышетӥсез сярысь вера: «Вениамин Набиокович – юн куронъёс пуктӥсь дышетӥсь вал. Куасэн бызьылонъя тренер луонэз солэн вираз пыӵамын, ужаз со бадӟымесь вормонъёс басьтӥз. Вениамин Набиокович Бигиней школае дышетыны лыктӥз мон 10-тӥ классын дышетскыку. Зэм, мон со дыре куаслэсь марзэ но уг тодӥськы вал. Одӥг ар куспын со кужмо куасчиосты «будэтӥз». Котькуд ёрос ӵошатсконысь вормонэн берытскылӥмы. Куасэн ветлон амалъёсты гинэ ӧвӧл, со куасъёсты ӵошатсконэ дасян амалъёсты но туж ӟеч тодэ вал. Та ӧрын ёросын солы вуисьёс ик ӧй вал, дыр. Котьку зэмлык палан луиз. Судействоын янгышъёс, валантэмъёс кылдо ке, Вениамин Набиокович одно ик ваньзэ эскерыса, йылаз-пумаз потоз вал. Со котьку вормон сярысь малпанэн улӥз. Ӵош ужам эшъёсыз но, кивалтэтын тыршисьёс но сое гажаллязы, ужезлы вылӥ дунъет сётъязы. Вераны кулэ, кема аръёс ӵоже Вениамин Набиокович Вязовкаысь Бигинее ветлыса ужаз: ӵукна лыктэ, урокъёс бере дораз бертэ. Кӧня сюрс иськемъёсты ортчоно луиз меда со аръёс ӵоже? Котькуд адями озьы ужаны уз чида.

      Школаез йылпумъям бере, армие мынытозь, со монэ аслаз бурд улаз басьтӥз: одӥг ар физкультурая дышетӥсьлэн юрттӥсез луыса ужай. Соку, лэся, солэн сямыз – дышетскисьёс азе юн куронъёс пуктон -  мыным но пыӵам. Вениамин Набиокович Бигиней школае дышетыны ӧй лыктысал ке, мон физрук ӧй луысал, улонме спортэн ӧй герӟасал. Берло аръёсы, пенсие потытозяз, со Вязовкаысь основной школаын дышетӥз. Солэн но мынам спортсменъёсмы куасын тужгес кужмоесь лыдъяськизы. Уж сюресэз но Вениамин Набиоковилэн аспӧртэм йылпумъяськиз: пенсие потон азяз, берпуметӥ ӵошатсконын, солэн командаез нырысетӥ интые потӥз. Солы дышетӥсь туж шумпотӥз. Тренер понна солэсь но дуно кузьым ӧвӧл».

      Та нуналъёсы Вениамин Набиоковичлы 85 арес тырмиз. Дано юбилейзэ со Фазила кузпалыныз, нылпиосыныз но внукъёсыныз пумитаз. 

      Миляуша НИГАМАТУЛЛИНА.

      Татышлы ёрос. 

      Рубрики:

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить

    ОБЪЯВЛЕНИЯ

    ПАРТНЕРЫ