Калык культураез утё но азинто

«Удмуртлыкез ӝутэм потэ»

Янаул ёросысь Шудек гуртысь культура юртлэн ӧсъёсыз котьку усьтэмын. Трос дыръя, ӵукна лыктыса, ӧнерчиос кагазэн герӟаськем ужъёссэс быдэсъяло, лымшор бере соос доры школаысь нылпиос вуо, «Тюрагай» ансамбле пыриськись арлыдоос репетициосы потало. 1964-тӥ арын ӝутэм культура юртын югыт, шулдыр, шуныт, 2014-тӥ арысен сое газэн шунто угось.

Культура юртэн кема аръёс ӵоже Валерий Нигиев кивалтӥз. Солэн кичӧлтэмезъя, нылпиослэн духовой оркестрзы ужаз. Али дыре культура юртэн Ангелина Менгафарова кивалтэ. Солы юрттӥсько жанръёсъя ӧнерчи Людмила Давлетшина, культура юртэз утялтӥсь Диана Гатауллина, библиотекарь Людмила Садыкова, юртысь пӧртэм ужъёсты быдэсъясь Руслан Зайдулин.

- «Тюрагай» фольклор ансамблен Людмила Давлетшина кивалтэ. Удмуртиысь Алнаш ёросысь Улысь Асановоысь вуэм ӧнерчимы (азьвыл со отын ужам – авт.) кылем арын куартолэзь пумын татын ужаны кутскиз. Вакчи дыр куспын Людмила Васильевна ужъёссэ ӟеч возьматӥз. Крезьгур инструментъёсын но – фортепианоен, синтезаторен – шудэ, гуртысь школаын крезьгуръя урокъёсты нуэ, крезьгуръёс но гожъя. Тоймобаш гуртын вордскыса будэм нылаш пичиысен кырӟанэн эшъяськем. Нырысетӥ кырӟанзэ - «Тюрагай» -  4-тӥ классын дышетскыкуз гожтэм. Сое ёрос конкурсын быдэстыса, вормисе потэм. 2004-тӥ арын школазэ йылпумъяса, Елабугаысь культурая училищелэн дирижёрско-хоровой ёзэтаз дышетскем. Солэн кырӟанъёсыз Удмуртиын потӥсь куд-ог изданиосын но печатласькиллям ни. Та дыре Людмила Васильевналэн дас витьлэсь трос кырӟанъёсыз лыдъясько, - вера Ангелина Сабировна.

Культура юртын нылпиослы вокалъя «Солнышко» но театральной кружокъёс ужало. Ангелина Сабировналэн котькуд нуналэз нылпиослы тодон-валан сётыса, репетициос радъяса ортче.

Кыӵе гинэ ужрадъёс, конкурсъёс ялӥсько, шудекъёс палэнэ уг кылё, азинлыко пырисько, вормисьёс пӧлын луо. Кылсярысь, кылем арын «Мои года – моё богатство» арлыдоослы ёрос конкурсын «Тюрагай» ансамбль 2-тӥ интылы кузё луиз. Удмурт калык праздникъёс но Шудекын ӵем радъясько. Соосты шулдыртон сярысь нырысь ик сюлмасько лулчеберет удысын ужасьёс.

- Ёросамы трос ужрадъёс ортчыло. Котьку одӥг номерез возьматыны уг луы. Удмуртлыкез ӝутэм потэ угось, быгатонлыкъёсты но адӟытоно. Соин ик малпаськыны кутским выль ансамбль кылдытон сярысь. Сое «Чибориё» нимамы. Милемыз синйылтӥзы Янаулын ортчем финн-угор калыкъёслэн фестивалязы, - вера Людмила Давлетшина.

«Чибориё» ансамбле А. Менгафарова, Л. Давлетшина, Д. Гатауллина, Р. Зайдулина, О. Мухаметшина, С. Хайретдинова пырисько. Вераны кулэ, шудекъёслэн выль кылдытэм ансамбльзы Татышлы ёросысь Выль Татышлыын ортчем ужрадъёсы но вуылӥз ни. Аспӧртэм эктон-кырӟанъёссы, асьсэ киосынызы вурем дэремъёссы учкисьёслы туж кельшизы.

Туэ культура юртын ужасьёс гуртооссэс спектаклен шумпоттыны малпало. Янаул ёросысь удмурт огазеяськонлэн кылдэмез дырысен 25 ар тырмонэзлы сӥзем бадӟым ужрад но Шудекын ортчытыны чакламын.

- Культура юртын ужасьёс ужзэс туж ярато, валаса, тыршыса ужало. Соос ужазы мар ке но выльзэ пыртон сярысь малпасько, огкылысь кариськыса, кенешыса ужало. Кузпалъёссы но соосты валало. Семьяын ог-огдэ валантэк таӵе ужын ужаны уг луы, - шуэ Шудек гурт поселенилэн администрациеныз кивалтӥсь Инзиля Минликаева.

«Мыным туж кельше

пичиосын ужаны»

Ангелина Менгафарова лулчеберет ӧре 2008-тӥ арын вуэм. Солы худруклэсь ужзэ оскиллям. Шудек гуртын вордӥськыса будэм нылашлэн азьло культура юртын ужало шуыса малпанэз ик вылымтэ.

- Мон Нефтекамскысь педучилищеын дышетски. Диплом басьтэм бере, гуртысь нылпи садын воспитатель луыса ужай, берло кивалтӥсе юнматӥзы вал. Жаляса верано, тылпу ӝутскыса, нылпи садтэк кылимы. Собере Янаулысь нылпиослы пансионатын ужай. Мыным туж кельше пичиосын ужаны. Басьтом, «Солнышко» кружокез. Отчы ветлӥсьёс пӧлысь тужгес пичиезлы ньыль арес. Ваньзы соос 32 кузя, - маде культура юртэн кивалтӥсь.

Ангелина Сабировна Вадим кузпалыныз кык нылъёс будэто. Бадӟымез нылзы, Елена, Сарапулысь медколледжын дышетске, нош Мариназы гуртысьтызы школае куинетӥ классэ ветлэ, со сяна, Янаулысь искусствоя школаын ватсаса тодон-валан басьтэ. 

- Уже мыным туж кельше. Ми ӵошен, соин уж капчи, котьмае вормыны луэ. Ӵошен ужась эшъёсылы тау кылъёсме верасько. Мар борды басьтӥсько, соослэн ваньмыз пӧрме: вуриськисез но, суредасез но, сувениръёс лэсьтӥсез но утчанэз ӧвӧл, - пальпотэ А. Менгафарова.

         Миляуша БУЛАТОВА.

Янаул ёрос.