Утё анай кылзэс, йылолзэс но лулчеберетсэс

Пётр Николаевич, кенешонэз усьтыса, республикалэн кивалтэтэзлы ужрадэз ортчытыны юрттэмез понна тау кариз. «Асьмелэн шаерамы, солэн котькуд регионаз пӧртэм калыкъёс уло. Башкортостанын но соос одӥг бадӟым семьяын выллем азинско: соос кылзэс, культуразэс, сям-йылолъёссэс утё но азинто, - кутскиз веранзэ Пётр Тултаев.  - Татысь кивалтэтлэн юрттэменыз, калык вордскем кылыныз вераськыны но лыдӟиськыны, дышетскыны быгатэ».

Кенешонэ пириськисьёслы республикамылэн Тӧроезлэсь шуныт кылъёссэ вуттӥз Тӧролэн Администрациеныз кивалтӥсьлэн воштӥсез Максим Михайлов. Со Кенешонлэсь финн-угор калыклэн улоназ бадӟым инты басьтэмзэ пусйиз.

Башкортостанын вить пӧртэм финн-угор калыкъёс уло. Соос пӧлысь кыкезлэн -  удмуртъёслэн но поръёслэн – газетсы потэ. Анай кылэз, культураез утёнын СМИ-ослэн люкетсы сярысь вераз республикаысь Печатья но иворъёсты вӧлмытонъя агентствоен кивалтӥсь Борис Мелкоедов.

Вераны кулэ, Кенешонын удмуртъёслэн национально-культурной центрзылэсь ужзэ но югдытӥзы. Со сярысь вераз НКЦ-лэн кенешезлэн секретарез Т. Н. Шайбакова. Кенешонлэн ужаз пыриськизы на историяя но культурая центрен кивалтӥсь И. М. Самигулова, Улысь Балтач школалэн директорез Л. Л. Зидымаков. Азьпалтыса верало, та нуналэ Татышлы ёрос администрациен кивалтӥсьлы Р. К. Гараевлы, национально-культурной центрен кивалтӥсьлы С. Г. Гарифуллинлы, удмуртъёслэн историяя но культурая центрзылы, «Ӧрӟи» но «Шулдыр ӝыт» ансамбльёслы БР-ысь финн-угор калыкъёслэсь культуразэс, сям-йылолъёссэс, фольклорзэс утемзы но азинтэмзы понна РФ-ысь Финн-угор калыкъёслэн ассоциацизылэн тау карон гожтэтэз сётэмын. Со сяна, ансамбльёслы БР-ысь Культурая министерстволэн тау карон гожтэтэныз пусъемын.

Бадӟым кенешон но «Об опыте книгоиздания финно-угорской литературы в России» котырес ӝӧк сьӧрын вераськон йылпумъяськем бере, куноосты Кармаскалы ёросын пумитазы. Татын «Башкортостан – территория мира и согласия» концерт ортчиз. Отын удмурт калыклэсь культуразэ возьматӥзы Улысь Балтачысь «Ӧрӟи» но Выль Татышлыысь «Шулдыр ӝыт» ансамбльёс.

«Туннэ нунал республикаысьтымы калыклэн улоназ бадӟым инты басьтэ. Башкортостанэ финн-угор калыкъёс пӧлысь трос куноос вуизы, - вераз республикаысь культурая министрлэн нырысетӥ воштӥсез Валентина Латыпова. – Ми данъяськиськомы Башкортостанысь финн-угор калыкъёсынымы. Соослэсь культуразэс утён понна вань кужыммес сётомы».

Дасяз Ольга

НИГАМАТУЛЛИНА.