Паймыса, йыръёсмес сэзъяса, ми пудо вордон интыосты эскериськом. Макем татын чылкыт! Ужасьёслэн тыршись, ужзэс валась луэмзы со бордысен ик шӧдӥське.
Кин гуртын улэм, скал вордэм, со ӟеч тодэ, макем секыт йӧтэ пудо вордон. Татысь фермаын 80 йыр пудо лыдъяське, соос пӧлысь 27-ез – кысконо скалъёс. Толлы сиён тырмыт дасямын. Татын кӧня ке ар ӵоже тыршыса ужало ни купченейёс Павел Пургин, Александр Сидоров но Николай Семёнов.
- Пудоосты йылэтон сярысь малпан вань, конешно, - вера хозяйствоен кивалтӥсь Николай Вождаев. – Но ваньмызлы коньдон кулэ. Кузпалэным ми кемалась ни пенсиын, кредит басьтыны секыт.
Озьы ке но Николай Ильич но Анастасия Николаевна киоссэс ал вылазы тырыса уг пуко. Арлыдоос уж вылын будэм адямиос угось. Зэм, соослэн азинскозы бордын ужзэс гажаса ужасьёссылэн люкетсы но бадӟым. Йӧлэз будэтон сярысь сюлмасько скал кыскисьёс Анастасия но Алевтина Вождаеваос. Среднесуточной привесэз возьматӥсь лыдпус но шумпотымон – 853 грамм. Кивалтэт фермаен кивалтӥсьлэсь Павел Агафоновлэсь ужзэ вылӥ дунъя. Озьы ик ужъёссэ ушъямон быдэсъя складэн кивалтӥсь, со ик электрик но, учётчик но, моторист но Иван Головин. Пудоосты ӟеч утялто скотникъёс Андрей Чукаев но Роберт Рахимов (соос ик уйин охранниклэсь ужзэ быдэсъяло), пудо врач Василий Головин.
Та фермаын ужасьёс, одӥг семьяын выллем, тупаса уло но ужало. Вань ужъёссэс ӵошен быдэсъяло. Шулдыр «красной уголоказы» (вераны кулэ, ёросын со тужгес устоеныз лыдъямын) шутэтско, верасько, ческыт чай юо.
Инна ИВАНОВА.
Ермекей ёрос.
Оставить сообщение: