- Пичи дыры мукетъёслэн выллем ик ортчиз. Ньылетӥ классозь Качкин-Турайысь начальной школаын дышетски. Нылпиос трос вал. Классын ми 20 кузя вал. Куд-ог классъёсын 22-24 дышетскисьёс лыдъяськизы. Котькуд гужем каникулъёс вунонтэм кылемын.
- Тӥ пичиысен ик ужаны дышыса будэмын.
- Гуртын сотэк уг луы. Сад, бакча, пудо, чипыос. Сизьыметӥ класс бере ик колхозын, склад ӝутон бригадаын, ужамы эшъёсын. Отын кык бригадиръёс но вить пиналъёс тыршимы. Соку ик вамыштӥськем, лэся, вуоно профессиелэн ӧраз. Ӝыт ке вуиз – экономикае йырын выйиськом вал. Бригадирлэн юрттӥсез лыктэ, расценкаос сётъя, нунал ӵоже ужаммес лыдэ басьтыса, туннэ нуналлы уждунмес лыдъяны ӵектэ.
Гужем вуэ, силос ворт-тӥсьёслы юрттӥськом. Соку «Техника безопасности» валан луымтэ, дыр, ини. Кузове тубыса, гуэ силос пазяллямы. Ӝытлы дӥськутмы цементэн каттырем кадь луэ вал.
Тодам на, бусыосы азьло сугон мертто вал. Сое юртлы быдэ люкылыса сёто, гужем отчы уриськыны ветлӥськом. Мак но трос кизьылӥзы. Октыку солэн кидысэз бусы тыр кисьтӥське вал, валтӥсь уж йырзэ бичан луиз.
- Дас классэз Бадӟым Качак школаын йылпумъяса, Тӥ Юматовоысь сельскохозяйственной техникуме дышетскыны пыриды?
- Школа бере одӥг ар Качкин-Турайысь библиотекаен кивалтӥ. Собере Юматовоысь техникуме вуи, бухгалтерлы дышетски. Студент аръёсы – улонлэн тужгес тунсыко вакытэз. Отын мон туж ӟеч тодон-валан басьтӥ. Кужмоесь ӧнерчиосты отын дасязы. Мыным отчы кыльыны но ӵекто вал.
- Вордӥськем музъемды бордаз кыскиз…
- Дышетскыны монэ «Красная звезда» колхоз ыстӥз вал. Соин ик бертӥ, направление ӧй ке луысал, оло, кыльысал но.
- Собере армие бась-тӥзы-а?
- Армие басьтӥзы Юматовоын дышетскыкум ик.
- Кияды дипломен Тӥ гуртады бертӥды. Кыӵе вал соку «Красная звезда» колхоз?
- Котырын тужгес тодмо луись хозяйство вал со. Ӧнерчиос туж кужмоесь, соос ог-огзэс валаса, кенешыса ужало. Колхозэн соку Анатолий Сакриевич Сократов кивалтэ вал. Со мыным трос юрттӥз. Озьы ик валтӥсь бухгалтер Василий Шайматович Тимиршин. Бадӟым тау соослы ваньмыз понна. «Красная звездаын» арлэсь кема валтӥсь бухгалтерлэн воштӥсез луыса ужай.
- Бӧрысь кызьы азинскиз уж сюресты?
- 1985-тӥ арын ёросысь гурт хозяйствоя управление вазизы. Собере МПМК-е валтӥсь бухгалтере юнматӥзы. Мон «уг» шуыны ӧй быгаты.
- Заочно Башкир кун аграрной университетын экономистлы дышетскиды, ёрос администрациен кивалтӥсьлэн экономикая воштӥсез, РайПО-ен кивалтӥсьлэн вузкаронъя воштӥсез, ёрос администрациын экономикая ёзэтэн кивалтӥсь луиды, 2006-2012-тӥ аръёсы - ёрос администрациен кивалтӥсьлэн экономикая, ӝутӥськонъя, промышленностья но ЖКХ-я воштӥсез. Ёросын пумиськись ужпумъёс, ёрослэн огъя улонэз, азинскон сюресэз Тӥледлы тодмо вал, дыр. Нош ёрос администрациен кивалтӥсь луо шуыса малпаськоды-а вал?
- Ноку ӧй малпаськы. Та ужез ӵектэм беразы но кема пумитъяськи.
-?
- Азьло Калтасы ёросын саклык висъяське вал нефть поттонлы. Огдыре сыӵе организациос ворсаськизы. Ёрос бюджетлы со юн шуккет луиз. Азьло нефтяникъёс техникаен но, материалэн но юртто ке вал, соос кошкемен, ЖКХ секыт югдуре шедиз. Кӧня адями уж интытэк кылиз. Ёрос администрациен кивалтон – со туж ответственной вамыш, ваньмыз понна кыл кутоно угось.
- Кивалтыны кутскиды. Нырысь ик марлы, кыӵе ужъёслы саклык висъяды?
- Ужпумъёс трос вал. Кызьы верай ни, шуг-секытъёс но. Ёрослэн аспӧртэмлыкез – со трос квартираё коркаос. Соосты утялтонэз капчи ӧвӧл, канализациен герӟаськем ужъёсыз гинэ кӧня пӧртэм. Со сярысь малпаськыны кутским.
Тужгес висьытӥсь ужпум – со нылпи садъёс вал. 2014-тӥ арын 120 интылы нылпи сад ӝутӥм.
Калтасыын гужем ву уг тырмы вал, калык арняен-арняен вутэк улӥз. Со проблемаез но палэнтӥм. Краснохолмскийын улӥсьёс но юон вузылэн ӟечлыкезлы ӝожтӥсько вал. Со бордын но ужамы. Кутеремын 18 трос квартираё юртъёсы газ пыртон борды басьтӥським, квартиралы быдэ нимаз газ котёл пуктылӥм. Куинь ар ини та пумысен кутеремъёс уг ӝожтӥсько. Кылем арын сыӵе ик уж быдэстэмын Калтасыысь 66 трос квартираё юртъёсын.
Ёросмы куасэз гажасьёсыныз висъяське. Спортсменъёсмы республика ӵошатсконъёсысь вормонъёсын берытско. Вань милям лыжной базамы. 2014-тӥ арын 1400 метръем лыжно-роллерной трасса ӝутӥм, со асфальтэн шобыртэмын, тылъёсын югдытэмын. Солы 10 миллион коньдон кулэ луиз. Ёросамы гужем но тол марафонъёс ортчыло. Отчы, кылсярысь, Нефтекамскысь, Бирскысь, Удмурт Республикаысь, Пермь шаерысь куасчиос, капчи атлетикаез гажасьёс лыкто. Котькуд мылкыд карись та ужрадъёсы пыриськыны быгатэ. Гужем марафон гудырикошкон толэзе Физкультурниклэн нуналэз улсын радъяське. Солэн спонсорез луэ ёрос газетмы – «Калтасинская заря». Вормисьёс коньдон тырытэк газетлы гожтӥсько. Туж трос калык люкаське, 5 аресъем пичиос но бадӟымъёсын ӵош бызё.
Спорт сярысь кылпум поттэм бере, вераны кулэ, ГТО-лы бадӟым саклык висъяськом. Кылем арын ульчаосы тренажёръёс пуктылӥм…
- Кыӵе ужпумъёс пуктэмын та аре?
- Россилэн Президентэз В. В. Путин но, республикамылэн Тӧроез Р. З. Хамитов но огез сярысь верало-сюлмасько: валтӥсь ужпум – со инвесторъёсты утчан. Со бордын ужаськом. Туэ «Победа» ООО-ын 1200 йыр пудолы комплекс ӝутыны чакламын. Правительство солы дурбасьтӥз.
Калтасыысь Культурая дворецез тупатон борды басьтӥським. Азьпала учконо ке, Краснохолмский посёлокын адямиослы улыны ӟеч луонлыкъёс кылдытоно, малы ке шуоно калык отчы «кыстӥське», гуртысь кошкемъёс но отчы улыны интыясько. Отысь кыкетӥ номеро школаын тупатъян ужъёс радъяны малпамын, али проект дасяськом.
«ППМИ», «Реальные дела» проектъёс ёросамы азинлыко ужало. Туэ но соосын пайдаяськомы.
Трос нылпиен семьяослы ӝутӥськыны инты сётъян сярысь но сюлмаськиськом. Вераны кулэ, со туж секыт уж. Ӝутӥськыны инты сётон понна, кагазъёс трос дасяно, олокӧня ведомствоос пыр потоно, малы ке шуоно сётоно музъем сельхозназначениын шуыса пусъемын. Сое воштон понна, генплан дасяно. Солы коньдон но кулэ, ваньзэ дасятозь, вакыт но ортчоз. Со бордын ужаломы.
Лулчеберетэз басьтоно ке, «Серебряная верёвочка» ужрад ортчытыны малпаськом. Сое ми кык арлы огпол радъяськом. Ёросмы – многонациональной. Соин ужрадъёс дасян бордын трос ужано, котькуд калыклэсь сям-йылолъёссэ, культуразэ лыдэ басьтытэк уг луы. Ужпумъёс трос чакламын.
- Ужады тужгес секытэз мар?
- Адями тон доры юрттэт курыса пыре. Сое кылзыса, тон валаськод – юрттоно. Но со дыре ик номырин юрттыны уд быгатӥськы. Самой секытэз со.
- Ваньмон дырдэс кызьы ортчытӥськоды? Оло, шутэтскыны дырды чик уг кыльы?
- Уж дурам лыктыса кошкытэк уг чидаськы, шутэтскон нуналэ но. Ӧй ке лыкты, сюлмы шуг. Ваньмон дырме внукелы сӥзисько, юрт котырысь ужъёсты быдэсъяса ортчытӥсько.
Куасэн ветлыны яратӥсько. Туэ, жаляса верано, куас вылэ одӥг пол гинэ султӥ на.
- Юрий Минзарипович, «Ошмес» газетлы кыӵе ӵектонъёсты вань?
- Вераны кулэ, «Ошмесэз» мон яратыса лыдӟисько. Газет бамъёсын тросгес мед печатласькысалзы фермер хозяйство кылдытэм удмуртъёс сярысь материалъёс, малы ке шуоно Калтасы ёросын удмуртъёс пӧлын сыӵе уж борды басьтӥськыны дӥсьтӥсьёс ик ӧвӧл, шуыны луоз. Гуртын будэм адями пичиысен ужлы дышыса будэ угось, кутскиз ке, солэн одно ик ваньмыз пӧрмоз, кышкаса улоно ӧвӧл.
- Нош лыдӟисьёслы мар сӥзьысалды?
- Тазалык, уж интызы мед луоз, анай кылзэс медаз вунэтэ, газетлы мед гожтӥськозы.
- Бадӟым тау, Юрий Минзарипович. Кема ӧвӧл Тӥледлы 55 арес тырмиз. Ӟечкыласьком! Тазалык, шудбур, семьяяды татулык, секыт ужады вормонъёс но азинсконъёс сӥзиськом.
- Тау.
Вераськиз Миляуша БУЛАТОВА.
Калтасы ёрос.
Оставить сообщение: