Нырысетӥ нуналэ куноос социальной технологиосъя башкир институтэ люкаськизы. Татын котырес ӝӧк сьӧрын вераськон ортчиз. Отын Башкортостанысь пӧртэм калыкъёслэн улонзы, этнокультурной туризмез азинтон но мукетыз сярысь вераськон мынӥз. Нош собере историяя но культурая центръёсын кивалтӥсьёс пӧртэм киужъёсъя мастер-классъёс возьматӥзы. Мылкыд карисьёс татын удмурт песьтэр лэсьтыны дышетскизы. Та ужлы соосты дышетӥз удмуртъёслэн историяя но культурая центренызы кивалтӥсь Ирина Самигулова.
Собере кыл сётӥськиз егитъёслы. Соос «Возрождение народных промыслов и традиций народов Башкортостана» проектэ пыриськемзы сярысь веразы. Студентъёс шумпотыса мадизы этнотуръёссы, пӧртэм калыкъёсын тодматскемзы сярысь. Удмуртъёслэн историяя но культурая центразы вуылэмзы сярысь бадӟым презентация возьматӥзы социальной технологиосъя башкир институтысь студентъёс. Сцена вылэ соос удмурт калык дӥськутэн потӥзы.
Кыкетӥ нуналэ форумлэн пленарной люкетэз «Башкортостан» концертной залын ортчиз. Собере «Легендой овеянные имена» историко-культурной туристической маршрутлы презентация радъяськиз. Со 112-тӥ Башкир кавалерийской дивизилэн кылдэмезлы 75 ар тырмонлы сӥземын вал. Та вакытэ ик «Многонациональная победа» квест ортчиз. Озьы ужрадэ пыриськисьёс куинь командаослы люкиськыса, пӧртэм конкурсъёс пыр ортчизы, куинь сэрего гожтэтъёс гожъязы, «Катюша» кырӟанэз пӧртэм кылъёсын кырӟазы, автомат сэрттӥзы-люказы но мукет. Нош собере куноосты солдат ӝукен сектазы.
Кык нунал ӵоже форумын удмуртъёс сярысь трос шуныт кылъёс веразы. Озьы бере, данъяськомы асьмелэн лулчеберетэнымы, сямъёсынымы но йылолъёсынымы, утёмы но азинтомы дуно анай кылмес.
Ольга НИГАМАТУЛЛИНА.
Оставить сообщение: