Нылкышно клубен
тодматскон
Удмурт культурая нуналъёс Татышлы ёросысь нылкышноослэн клубенызы тодматскон бордысен кутскизы. Солэн ужез сярысь мадиз Башкортостанысь удмуртъёслэн историяя но культурая центренызы кивалтӥсь Ирина Самигулова. Нылкышно клуб историяя но культурая центр борды кылдытэмын угось. Собере кыл сётӥськиз огазеяськонлэн котькуд гуртысь ёзэтэныз кивалтӥсьёслы. Нылкышноос быдэстэм ужъёссы сярысь шумпотыса веразы, азьпалэзлы малпанъёсынызы люкиськизы. Нош собере клублэсь ужзэ дунъяса вераськизы на Удмурт Элькунысь культурая министрлэн воштӥсез П. П. Данилов, «Удмурт дунне» газетлэн корреспондентэз Л. И. Тихонова, «Кизили» журналлэн валтӥсь редакторез У. Ш. Бадретдинов, «Кузебай Герд» нимо гимназиысь удмурт кылъя дышетӥсь Е. В. Перевозчикова, республикаысьтымы удмуртъёслэн НКЦ-енызы кивалтӥсьлэн воштӥсез Ю. С. Саитов, БР-ысь удмуртъёслэн НКЦ-зылэн Кенешезлэн секретарез Т. Н. Шайбакова.
Учкисьёс паймыса кылзӥзы УдГУ-ысь удмурт филологияя, финно-угроведениея но журналистикая институтын ужась Жофия Сиракиез. Удмурт Элькунэ со Венгриысь вуэмын.Та нуналэ Жофия шаерысьтызы нылкышно клубъёслэн ужзы сярысь удмурт кылын мадиз. «Берпуметӥ дас аръёсы котькуд гуртын таӵе огазеяськонъёс кылдӥзы. Милям гуртамы но вань нылкышно клуб. Но солэн ужаз пыриськисьёслэн калык дӥськутъёссы ӧвӧл, соос огшоры чебер дэрем нулло, - кутскиз Жофия веранзэ. – Гуртамы 2800 пала адями улэ. Венгриын пиналъёслы туж секыт сям-йылолъёсты, дӥськутъёсты валэктыны».
«Книгаос вужмемын, соосты выльдоно»
Пумиськон творческой площадкаосын азинтӥськиз. Дышетӥсьёсын, нылпи садысь воспитательёсын кенешонэ филологияя, финно-угроведениея но журналистикая институтысь журналистикая кафедраен кивалтӥсь Д. А. Ефремов, УДНИИ-ын ужасьёс Ю. Т. Байтерякова но Л. В. Бусыгина пыриськизы. Дмитрий Анатольевич нырысь институтсылэн улонэз сярысь вераз, отчы дышетскыны пырон понна экзаменъёсын тодматӥз. Собере кыл сётӥськиз дышетскисьёслы удмурт книгаос дасян бордын ужасьёслы. «2010-тӥ арысен учебникъёс выльдэмын. Удмурт Элькунын соос удмурт кылэз воксё тодӥсьтэмъёслы но ӟеч тодӥсьёслы нимаз дасямын. Но, кызьы ми адӟиськомы, тӥ доры соос вуэмын ӧвӧл на. Книгаосты туннэ издательствоысь басьтыны луэ», - вераз Юлия Тихоновна. Нош Людмила Васильевна лыдӟон книгалэн электронной учебникеныз тодматӥз. Отчы книгаын выллем ик материалъёс пыртэмын. Зэмзэ вераса, со бордын ужасьлэн кылъёсызъя, вотэсысь книга трослы узыргес. Отчы дышетскись понна но, дышетӥсьёслы но трос тунсыкоез пыртэмын. Ваньмыз чылкыт удмурт кылын гожтэмын.
(Пумыз. Кутсконэз 1-тӥ бамын).
Бадӟым классъёсын
пумиськон площадка
9-11-тӥ классъёс понна радъяськем площадкаез мон «Тунсыко площадка» нимасал. Дышетскисьёс гинэ ӧвӧл, мон но татын трос выльзэ, тунсыкозэ тодӥ. Пумиськонлэн нырысетӥ люкетэз УдмуртЭлькунысь егитъёслэн «Шунды» мерлыко огазеяськонзылэн уженыз тодматсконлы сӥземын вал. Огазеяськонлэн азьвыл кивалтӥсез Ольга Тронина «Шундыкар» лагерь сярысь вераз, «Литература» отрядэ ветлэм пиналъёслэн ужъёссыя поттэм бичетъёсын тодматӥз. «Видеоискусство» отрядэ пыриськемъёс лагерь улонэз возьматӥсь клип дасяллям. Сое площадкае люкаськем дышетскисьёс туж шумпотыса учкизы. Со сяна, площадкаын секыт югдуре шедем нылпиос понна «Тулкым» но егит азьветлӥсьёслы «Вамыш» лагерьёс сярысь вераськон мынӥз.
«Шунды» огазеяськонэн кивалтӥсь Алина Чернова пиналъёсты огазеяськонлэн азинлыко ужась программаосыныз, проектъёсыныз тодматӥз, «Шундылэн» кичӧлтэмезъя радъяськись ужрадъёс сярысь вераз, кылъёссэ со видеоматериалъёсын юнматӥз.
Площадкалэн кыкетӥ люкетэз юан-веран амалъя ортчиз. Бадӟым классъёсын пумиськонэ егит кырӟасьёс пыриськизы: республикаысьтымы Янаул ёросысь Барабановка гуртын вордскыса будэм, али Ижевскын улӥсь Ксения Ахметханова но Удмуртиысь Кияса ёросысь Тӥгырмен гуртысь Альбина Беспалова. Егит «кизилиослы» Алина Владимировна тунсыкоесь юанъёс дасям. Нылъёс нырысьсэ сцена вылэ потэмзэс но тодазы ваизы, серемес учыръёсынызы но люкиськизы, «Куарагур», «Элькуновидение» конкурсъёсы пыриськемзы сярысь но мадизы. Та площадкае шедемъёслэн тодон-валан шыкыссы трослы узырмиз, шуыны луоз.
Та выллем площадкаос кыкетӥ нуналэ Улысь Балтач школаын ужазы. Удмурт Элькунысь куноос татын но дышетскисьёслы, дышетӥсьёслы, воспитательёслы трос выльзэ сётӥзы, визь-кенешен юрттӥзы. «Милемыз нырысьсэ оркестрен пумитазы», - пумиськон бере веразы куноос.
Котырес ӝӧк сьӧрын вераськон
Котырес ӝӧк сьӧрын вераськонлэн темаез луиз «Взаимодействие с органами власти и с общественными организациями, направленными на сохранение, изучение и развитие национальной культуры и языка удмуртского народа». Отчы УР-ысь национальной политикая министрлэн воштӥсез, «Удмурт Кенеш» огазеяськонэн кивалтӥсь Татьяна Ишматова, УР-ысь культурая но туризмъя министрлэн воштӥсез Пётр Данилов, УР-ысь Камсьӧр удмуртъёслэн огазеяськонэнызы кивалтӥсь Флюра Чибышева, «Удмурт Кенеш» ассоциацилэн кенешезлэн ёзчиез Николай Мусалимов, «Кизили» журналлэн валтӥсь редакторез Ульфат Бадретдинов, БР-ысь удмуртъёслэн НКЦ-енызы кивалтӥсь Салимьян Гарифуллин но солэн воштӥсез Юрис Саитов, БР-ысь удмуртъёслэн ИКЦ-енызы кивалтӥсь Ирина Самигулова, НКЦ-лэн Кенешезлэн ёзчиосыз, «Удмурт культурая нуналъёс» улсын радъям площадкаосын ужасьёс но журналистъёс пыриськизы. Ужрадэз усьтыса вераськиз Татышлы ёрос Кенешлэн секретарез Радик Рахимов. Со вакчияк ёрослэн азинскон сюресэныз тодматӥз, татын удмурт культураез утёнлы трос саклык висъяське шуыса пусйиз.
Cалимьян Гарифуллинович вераськонзэ выль ивор бордысен кутскиз – Хайбулла ёросын но удмуртъёс, пе, уло, соосын кусыпъёс юнматон сярысь кылпум ӝутӥз. «Усточикар» лагерь сярысь но вераз: сое радъянэн герӟаськем шуг-секытъёсты ӵошен вормыны капчигес луоз шуиз. Башкортостанысь удмуртъёслэн НКЦ-зылэн Кенешезлэн секретарез Татьяна Шайбакова ужрадэ пыриськемъёслы Ренат Биктимирович Галямшинлэсь ӟырдыт саламзэ вуттӥз, удмуртлыкез утён вылысь ужрадъёсты радъяны юрттэмзы понна гурт поселениослэн администрациосынызы кивалтӥсьёслы, СПК-ослэн кивалтӥсьёссылы тау кылъёссэ вераз. НКЦ-ен нылпиос понна радъям фестивальёс, конкурсъёс удмурт нылпиослы огазеяськыны, анай кылынызы вераськыны юртто шуиз.
Татьяна Ишматова башкир музъемын улӥсь удмуртъёс доры котьку шумпотыса вуэмзы сярысь вераз.
- Татын милемыз котьку шуныт пумитало. Азьланяз но ӵошен ужаломе, тросгес но тросгес мед луозы асьмеды огазеясь выжъёс, - шуиз Татьяна Витальевна. Удмурт Элькунысь вуэм куноос кузьымъёсын лыктӥллям: школаослы книгаос кузьмазы.
Николай Мусалимов Башкортостанысь удмуртъёсын данъяськемез сярысь вераз. Солэн кылъёсызъя, татын туж умой утисько но азинско удмуртъёслэн сям-йылолъёссы, лулчеберетсы но кылзы.
- Лулчеберет сярысь верано ке, башкир музъемын трос удмурт коллективъёс «калык ансамбль» нимлы кузё луэмын. Со туж шумпотымон. Тросэз культура удысын ужасьёс Удмуртиын дышетскыса, вордскем палъёсазы ужаны берытскизы. Татын национально-культурной центрлэн кужмо ужез шӧдӥське. Башкортостанысь потэм удмуртъёс Удмуртие вуыса но асьсэды умой возьмато, вылӥ дышетскон юртъёсын тодон-валан басьто, устоесь ӧнерчиос луо. Вормонъёс сярысь пумтэм вераны луэ. Кӧня ке ар ӵоже ни ми Башкортостанысь удмурт гуртъёсысь культура юртъёсын, клубъёсын кивалтӥсьёсын ужан амал радъяны малпаськом: Удмурт Республикаысь клубъёслэн ужъёсынызы соос мед тодматскысалзы вылэм. Клубъёс асьсэ пуштроссэс возьматыны мед быгатозы. Со сяна, Удмуртиын «Центр декоративно-прикладного искусства» сеть азинске. Кылсярысь, асьмеос ӵыжы-выжыосмылэн куэм дӥськутъёссы сярысь умой тодӥськом, куд-ог дыръя сое дӥсяськом но. Нош дунъяны быгатӥськом-а? Аслад киосыныд пӧрмытэм арбери дунолэсь но дуно луэ. Соин ик туала улонын но мед луозы куиськисьёс, - вераз Пётр Павлович.
Ульфат Бадретдинов удмурт кылъя но литературая книгаос сярысь кылпум ӝутӥз: Башкортостанысь удмурт школаосын выль учебникъёс уг тырмо. Та пумысен Ульфат Шайхутдинович БР-ысь Дышетонъя министерствое коллективной гожтэтэн вазиськыны ӵектӥз. Со сяна, «Ошмес» газетлэсь тиражзэ будэтон вылысь сюлмаськыны куриз, удмурт школаосысь библиотекаосын, «Писатели Башкортостана» сэрегъёсы, Башкортостанысь потэм но солэн палэназ улэм яке улӥсь гожъясьёслэсь но нимъёссэс пыртыны куриз.
Юрис Саитовлэн вераськемезъя, НКЦ-лэсь 20 ар ӵоже кыстӥськись сюрессэ син азе яркыт пуктыны луиз. Нырысетӥ вамышысен туннэ нуналозь быдэстӥськем ужъёс сярысь со вераз.
- Национально-культурной центр кылдэмен гинэ Башкортостанысь удмуртъёс огазеяськизы, эшъяськизы, азьло соос ог-огзы сярысь тодӥллямтэ. Нош кӧня ужъёс, проектъёс ӵошен быдэстӥсько? Нылпи творчествоя фестиваль, «Усточикар», «Чеберина», «Ӝужась кизилиос» - удмурт нылпиосты огинэ люкась ужрадъёс. Кылсярысь, калык нимлы кузё луэм ансамбльёс. Соос котькуд ужрадъёсы пырисько. Кӧня вӧсьёс улӟытэмын! Вераны кулэ, Янаул ёросысь Банибашын, Норканын, Каймашабашын гуртъёслэсь нуналъёссэс радъямы. Ужрадэ гурт калык но, кивалтэт но пыр-поч дасяськизы. Шуныт пумиськонъёс кемалы тодэ кыльымон луизы, со сяна, гуртъёс но, шуом, выльдӥськизы: ульчаосты тупатӥзы, гурт калык юртъер котырзэ шулдыртон, чеберман сярысь сюлмаськиз. НКЦ-лэн ужез сярысь трос вераны луэ. Со ужъёс сярысь тодӥськом «Ошмес» газетэз лыдӟыса. Удмурт кылын потӥсь газетмы ӧй луысал ке, ог-огзылэсь палэнын улӥсь удмуртъёс выль иворъёсты тодысалзы шат? Огинэ кариськыса гинэ бадӟымесь ужъёсты вормиськом, - шуиз Юрис Саитович.
Котырес ӝӧк сьӧрын вераськонлы йылпумъян лэсьтӥз Ирина Самигулова. Со шуиз:
- Котькуд ужын луо секытлыкъёс. Шумпотымон, вань сыӵе адямиос, кудъёсызлы котьку юрттэт курыса вазиськыны луэ. Оскисько, азьпалан но бадӟымесь ужъёс быдэстӥськозы, вормонъёс луозы.
Шулдыр ӝыт
Котырес ӝӧк сьӧрын вераськон бере, ӝыт, Выль Татышлыысь культура юртын концерт радъяськиз. Сое «ас кылме данъясько, вордскем шаерме яратӥсько» кылбур чуръёсын усьтӥз Майск гуртысь Полина Марданова.
Концертын удмурт калык кырӟанъёс но чузъяськизы, сцена вылын эстрадаысь «кизилиос» но ворекъязы. Учкисьёслы шулдыр мылкыд кузьмазы Татышлы ёросысь «Ӧрӟи», «Марӟан», «Шулдыр ӝыт», «Уӵы ныл» калык ансамбльёс, Калмиярысь Светлана Мардамшина, Вилия Шайсултанова но «Инвожо» вокал ансамбль, Удмурт Элькунысь вуэм кырӟасьёс Александр Катков, Ксения Ахметханова но Альбина Беспалова, Илиш ёросысь куноос – НКЦ-лэн Кенешезлэн ёзчиез Сильвия Шайдуллина но «Пинал сюлэмъёс» ансамбль, Бурай, Калтасы но Янаул ёросъёсысь «Инвожо», «Зангари» но «Югдон» калык фольклор коллективъёс.
Концертэ лыктэмъёс задор мылкыдэн учкизы Выль Татышлы школаысь покчи классъёсын дышетскись пиослэсь - «Унябейёслэсь» - эктонзэс.
Ольга НИГАМАТУЛЛИНА,
Миляуша БУЛАТОВА.
Оставить сообщение: