Удмуртлыксэс кырӟан гуръёсын утё

1989-тӥ арын Илиш ёросысь Итеевоысь культура юртын выль ансамбль кылдӥз. Сое «Шулдыръёс» ниманы малпазы. Со дырысен ансамбльлэн кырӟасьёсыз но кӧняез ке воштӥськизы ни, репертуарез но пӧртэмгес луиз. Озьы ке но «Шулдыръёс» учкисьёслы шулдыр удмурт гуръёссэс кисьто. Со пумысен ансамблен кивалтӥсь Сария Сарварова жаляса вера: «Репертуармы удмурт кырӟанъёсын туж узыр ӧвӧл. Соин куд-огзэ бигер кылысь берыктыса быдэстоно луиськомы».

Туннэ ансамбле 15 кырӟасьёс но эктӥсьёс ветло. Соос пӧлысь тужгес бадӟымезлы 70 арес, пе, тырмемын. Нош пичиосыз – школаын дышетскисьёс. Пиналъёс анай яке атай кылзэс уг ке но дышето, кырӟаны усто пӧрмыто. «Милям гуртмылэн одӥг палаз гинэ удмуртъёс уло, мукет палаз – башкиръёс но бигеръёс. Тросэз семьяос сураськемын ни. Соин гуртамы удмурт сямен вераськисьёс ӧжыт», - вера ансамбльын кырӟась Фанзиля Хаертдинова. Со Ташкичиын будэмын, соин анай кылзэ ӟеч тодэ, чебер вераське.

«Шулдыръёс» арлы быдэ ёросазы пӧртэм ужрадъёсы пыриськыло. Нош 2015-тӥ арын соослэсь быгатонлыксэс вылӥ дунъязы – «калык ансамбль» ним сётӥзы.  

«Пинал сюлэмъёс»

1992-тӥ арын Илиш ёросын кыкетӥез удмурт ансамбль кылдӥз. Отчы Ташкичиысь песяйёс люкаськизы. Соин ансамбльзэс но соос кема малпаськытэк «Пинал сюлэмъёс» нимазы. Школаысьтызы дышетӥсьлэн Аниса Марваровна Муксимовалэн кивалтэмез улсын, ташкичиос соку «Вӧй келян» ёрос ужрадэ пыриськизы. Песяйёс отысь бурдъяськыса выллем бертӥзы. Соослэн пинал сюлэмъёссы нуналлы быдэ сямен культура юртазы репетициосы мыныны куриськизы. Нылкышноос туннэ ке но огазе шумпотыса люкасько. Сизьымдон куинь аресъем Василя Минибаева но дораз пукыны уг чида. Со азьвыл культура юртэн кивалтэм, 30 арлы матэ та удысаз тыршем.

«Азьвыл сцена вылэ ми вож дэремъёсын потамы. Табере костюмъёсмы воштӥськизы. Дэремъёсты вурон сярысь сюлмаськизы ансамблямы ветлӥсьёс Таскира Сабирова но Гульзина Тимергазина. Соослы юрттӥз Людмила Исхакова, - вера культура юртэн кивалтӥсь Гульнара Сафиева.  – Ансамбле туннэ тросгес нылкышноос ветло. Соос пӧлын Афина Гибадуллина, Расиля Валиева, Таскира Сабирова, Фаузия Калимуллина, Римма Минетдинова, Любовь Минеахметова, Аниса Муксимова, Альмира Хакимова». Со сяна, «Пинал сюлэмъёслы» юрттэ на Равиль Минеахметов.

«Пинал сюлэмъёс» ансамблез ёросазы котькуд ужрадысь пумиталод. Кылсярысь, «Моя малая родина» конкурсын соос удмурт калыклэсь ортчемзэ но туала улонзэ возьматӥллям. Отын гуртысьтызы кибашлыослэн киужъёсынызы адӟытон, мастер-класс дасяллям.

Илиш ёросын удмуртъёс сокем трос ӧвӧл. Ӵыжы-выжыоссылэсь но соос трослы палэнэ интыяськемын. Озьы ке но республикаысьтымы удмурт калыкен кусыпъёссэс уг ышто. «2009-тӥ арын «Дуно марӟанъёс» конкурсэ пыриськимы. Со Татышлы ёросысь Выль Татышлы гуртын ортчиз», - вера Аниса Муксимова. – Азьланяз но Башкортостанысь удмурт огазеяськонэн герӟаськем ужрадъёсы пыриськыны тыршомы».

Ольга НИГАМАТУЛЛИНА.

Илиш ёрос.