Таӵе пумиськонъёс эшшо но тунсыко но вылӥын луо, отчы трос пӧртэм интыосысь тодосчиос люкаськизы ке. Таяз но усто луиз, симпозиуме Кострома, Самара, Казань, Пермь, Тобольск, Новгород, Санкт-Петербург, Глазов, Екатеринбург, Иж, Тарту, Париж, Инсбрук, Вена каръёсысь тодосчиос вуизы.
Нырысь ик кыл сётӥськиз Лудорвай музейлэн директорезлы Татьяна Шкляевалы. Собере Кам но Ватка куспысь музъемъёсын 19-тӥ даурлэн пумаз но 20-тӥ даурлэн кутсконаз сакральной интыослэн радъяськемзы сярысь ужезлы йылпумъян лэсьтыса вераськиз Н. И. Шутова. Асьме камсьӧр удмуртъёслэн вӧсяськон интыосазы астэ возён сямъёсты но сое валан сярысь вераськон нуиз Эва Тулуз. Бӧрысь но удмурт калыклэн сям-йылолъёсыз, сиёнъ-юонъёсыз но мукетыз сярысь трос тунсыкозэ мадизы на.
Пӧртэм темаосъя эскерем но дасям докладъёсты кылзӥськон но соос сярысь вераськон сяна, Лудорвай музейын ортчытӥзы куноослы экскурсиос. Озьы ик симпозиумлэн нырысетӥ нуналаз усьтӥськиз «Быдӟым куала» экспозиция. Со куалаын пӧзьтэмын вал вӧсь ӝук. Берло соин вань люкаськем калыкез сектазы.
Мукетыз адӟытон вал на Балезиноысь суредаськисьлэн Владимир Наговицынлэн ужъёсызлэсь, со нимамын вал «Оскисько ӝужась шундылы» шуыса. Солэн ужъёсыз туала дыре тунсыко но азьветлӥсь этнофутуризм сямъя лэсьтэмын луо. Со сяна, пичияк «Дуннелэн кылдэмез» шуыса нимам адӟытонэн тодматӥзы Ижысь суредаськисьёс но лэсьтӥськисьёс Анфим Ханыков, Евгения Мальцева но Роман Постников. Соослэн уже кутон амалъёссы: суредан, скульптура, видео, инсталяция.
Котькыӵе пумиськонъёсты тужгес но мыло-кыдо каро кузёослэн куноосты пумитаны дасяськемзы но пумитаны быгатэмзы. Та ласянь удмурт тодосчиос но Лудорвайын ужась коллегаос туж умой дасяськемын вал. Симпозиумлэн ужез мынон вакытэ котьку ик радъямын вал нуназеян но самовар пыртон кусып каронъёс. Куноосты табанен но перепечен, куасамняньёсын но мильымъёсын, шыдэн-ӝукен-пунемен, пӧсятэмен но ческыт турыно чаен сюдӥзы но сектазы.
Татьяна Миннияхметова.
Инсбрук.
Оставить сообщение: