Шарбинса Ахметгалиевна гуртысьтызы Быдӟым Атыкай ожысь ветеран огназ гинэ чырткем на. Бен, чырткем. Укмыстон одӥг арессэ тырмыса но со шаплыкеныз, йырсазьлыкеныз висъяське. Будыкуз улон ӧз ке но нуныя, Шарбинса Ахметгалиевна пумитаз шедем шуг-секытъёсты пыд улаз лёгыны вормиз. Дас куать арессэ тырмем бераз ик со Быдӟым ожез пумитаз. Та аръёсы Шарбинса песянайлы ас вылаз трос курадӟонъёсты чидано луиз. Соос пӧлысь сюлме пыӵамон, пе, кылизы Нижний Тагилын заводэз утемез. «Пропускнойын сылӥ, кие винтовка сётӥзы. Суткаяз тямыс час часовойын сылылӥм. Шутэтсконэз тодытэк трос бызьылӥм. Сиён тырмыт ӧй вал», - ортчем аръёссэ тодаз вайыса синкылиос пыр вера песянай. 1943-тӥ арын гужем сое Нижний Тагилэ басьтӥллям. Отын Шарбинса Ахметгалиевна куинь ар тыршем. Вордӥськем гуртаз берытскыса но ужтэк пукыны чидамтэ. Колхозын пӧртэм ужъёсты быдэсъям.
1946-тӥ арын улон Шарбинса песянаез гуртысьтызы ик Шарифуллаен герӟам. Со 1938-тӥ арын армие кошкем. Отысен ик пинал солдатэз оже келяллям. Шарифулла песятайлы ожысь берытскыны кылдэм. Куамын ар ӵоже соос кузпалыныз шудо улӥллям. Сизьым нылпи, вить пи но кык ныл, будэтӥллям. Но ожлэн пытьыосыз Шарифулла песятайлэн тазалыкез вылын шӧдӥськиллям. Озьы со 1976-тӥ арын югыт дуннеен люкиськем. Шарбинса песянайлы кузпалзэ ыштэм сяна, кык пиосыныз но люкиськоно луэм. Соослэн но улонзы вазь чигем. Пересьмон, шудо нуналъёссэ песянай Дамир пиеныз ортчытэ. Нош секыт, сютэм аръёсы улэм-вылэмзэ, тыршемзэ уно медальёсыз тодаз вайыто. Соос пӧлысь «За победу над Германией», «Ветеран труда» медальёс но «Медаль материнства» адӟыны луэ. Со сяна, Шарбинса Ахметгалиевналэн Быдӟым Атыкай ожын вормонлы сӥзем медальёсыз гадяз чиляло на.
- Шарбинса песянаез ми ум вунэтӥське. Нылпиосын пумиськонъёсы ӵемысь ӧтьылӥськом. Со будӥсь пиналъёслы секыт ож аръёсы улэмзы но тыршемзы сярысь маде, - вера гуртысь клубен кивалтӥсь Фаниля Шаймутдинова.
Гуртазы сяна, ожысь ветеранэз ёросазы но сӥлы каро. Кылем арын Шарбинса Ахметгалиевнаез 90 арес тырмон юбилееныз ӟечкыланы ёрос администрациенызы кивалтӥсь Алмаз Юсупов, Кушнаренковоысь телевидение вуылэм. Озьы ик та нуналэ Алмаз Мамдухович Россия Федерацилэн Президентэзлэсь В. В. Путинлэсь но ӟечкылан кылъёссэ вуттэм. Ми но Шарбинса песянайлы азьпалан шыпыт улон, тазалык но ваньзэ ӟечсэ сӥзим.
Марина НИКОЛАЕВА.
Кушнаренко ёрос.
Оставить сообщение: