Быдэс арлы кужым басьтӥм

Валерий Галиахметов: «Шундыкар» мыным кыкетӥ ползэ ни ӧсъёссэ усьтӥз. Со туж шуныт пумитаз, трос выль эшъёс но тодон-валан кузьмаз. Ноку уг вунэты та шудо дас нуналъёсты, эшъёсын сюлмысь вераськонъёсты. Мон «25-тӥ кадр» отрядын шутэтски, видеоискусстволы дышетски».

Фёдор Мениев: «Шундыкарын» мыным туж кельшиз. Милям отрядмы вал «Оскар басьтӥсьёс». Ветлӥмы театральной мастерское. Отын милемыз пьесаын шудыны дышетӥзы. Котькуд нунал тунсыко конкурсъёс ортчылӥзы. Соос милемлы ог-огмес матысьгес тодыны но эшъяськыны юрттӥзы. Вуоно арын «Шундыкаре» мон одно ик мынысал на».

Алёна Самигулова: «Лагере мон вуи нырысьсэ, дас нунал суредасьёс пӧлын ужай. «Шундыкар» сярысь кык-куинь кылын гинэ уд вера. Котькудӥз нунал сярысь бадӟым верос кылдытыны луысал, малы ке шуоно соос тунсыко но аспӧртэм ортчылӥзы. Нырысь вераме потэ «Шундыкар» нылпиос сярысь. Лагере вуэм бере мон пайми сомында усто нылпиослы. Вераме потэ на Евгений Бикузин яке Чудья Жени сярысь. Со мыным выль суредъёс возьматӥз, трос выль малпанъёс сётӥз. Занятиос капчиен ортчылӥзы, кабинетысь потэм но уг поты ни вал. Нош вожайтомы, Максим, бадӟым ӟечок луиз. Солэн тыршеменыз милям отрядмы одӥг семья кадь луиз, солэн верам кылъёсыз ог-огмес гажаны дышетӥзы. «Шундыкарысь» мон мукет адями луыса бертӥ. Шумпотӥсько, мынам улонысь дас нуналэ таӵе усто лагерьын ортчиз шуыса».

Линда Гильманова: «Лагерьын мыным туж кельшиз. Татын мон тодмоосыным пумиськылӥ, выль эшъёс шедьтӥ. «Шундыкар» - номырин ӵошатонтэм лагерь. Татын 10 нунал туж ӝог ортче. «Шундыкарын» мон кырӟасьёс пӧлын шутэтски».

Валерия Мардамшина: «Мон «Эктӥсьёс» отрядэ ветлӥ. Со туж эшлыко луиз. Вожатоймы вал Виталик, нош ӧнерчимы – Татьяна Семёновна. Соос асьсэлэн задор мылкыдынызы милемыз трос ужъёслы бурдъяллязы. Вожатоймы нуналмес тунсыко но шулдыр ортчытыны юрттӥз. Ӧнерчимы выль эктонъёс дышетӥз. «Шундыкарын» мон быдэс арлы кужым басьтӥ. Жаляса верано, «Шундыкаре» мон нырысьсэ но берпуметӥзэ ветлӥ. Туэ 11-тӥ классын дышетскисько. Выль эшъёсылэсь мон туж мӧзмо. Азьланяз но «Шундыкар» трос нылпиослы озьы ик шумпотон мед ваёз».

Линда Зидымакова: «Мыным туж кельшиз «Шундыкарын». Отын умоесь, шаплыесь вожатойёс, ӧнерчиос вал. «Шундыкарын» тунсыко ужрадъёс, шудонъёс, ӵошатсконъёс луизы. Татын трос вылезлы дышетски. Мон фольклор отрядэ ветлӥ. Милемыз Екатерина Коротаева дышетӥз. Лагерьын выль эшъёсын тодматски. Луысал ке, азьланяз нош ик берытскысал «Шундыкаре».

Альбина Баширова: «Шундыкаре» мон нырысьсэ вуылӥ. Мыным отын туж кельшиз. Смена ворсаськем дырысен трос нуналъёс ортчизы ни кадь, выль дышетскон ар но кутскиз ни. Нош мон малпанъёсыным ялан «Шундыкарын» улӥсько на. Огкылын вераса, «Шундыкар» - со космос. Омыр но отын кыӵе ке мукет, капчи. Нош ми, пиналъёс, кузьылиос кадь ӵукнаысен ӝытозь ужаськомы, шулдыръяськиськомы, тодматскиськомы - мӧзмыны дыр ик ӧвӧл. Ӧнерчиосмы дышетыны но, серекъятыны но, маскаръяськыны но быгато. Ӝытъёсы тодматскимы пӧртэм удмурт эктонъёсын. Соку ми ваньмы удмурт костюм дӥсяськомы вал. Нимысьтыз вераме потэ театр отряд сярысь. Ӧнерчимы Дмитрий Корепанов (Митрей агай) милемлы Пётр Захаровлэсь «Гондыр сюан» пьесазэ дасям. Пьеса капчи ӧй вал, сое дасян понна зол тыршоно луиз. Котькудӥз пинал геройзэ ӟеч возьматон понна, солэсь биографизэ, характеристиказэ эскериз. Занятиосын артикуляция бордын ужамы. Ӝогверанъёс верамы, шонер шоканы, куараен ужаны дышетскимы. Милям тыршеммы огшоры ӧз луы. Пьесамес синкылиен учкизы. Нош Митрей агаймы сое пуктэм бере, милемлы йыбырттыса бадӟым тау кариз. Мынам вераме потэ бадӟым тау Митрей агайлы, милемыз дышетэмез понна.  «Шундыкарлы» бадӟым тау!»

Дасяз

Ольга НИГАМАТУЛЛИНА.