1982-тӥ арын Тюльдиысь школаез йылпумъяса, Флюр Михайлович Шаритдинов Уфа вӧзысь «Михайловское» СПТУ-э дышетскыны пырем. Со дыре отын мушкасьёсты, бакча но сад будэтӥсьёсты дасяло вылэм. Флюр Михайлович муш утён ӧрез быръем. Армие мынытозяз теорияя тодон-валан люкам. Службаез бере Бирскысь МПМК-лэн муш бакчаяз практика ортчем, мушкасьлэн юрттӥсез луэм. Егит ӧнерчилы отчы ик ужаны кыльыны ӵекто вылэм, солэн сюлмыз вордӥськем палъёсаз куриськем. 1985-тӥ арын Ленин нимо колхозлэн муш бакчаяз ужаны кутскем. Яратоно ужаз со йырыныз-пыдыныз выем, шуыны луоз. Муш бакчалы инты но ачиз быръем. Отчы омшаник, пичигес корка пуктэм, улмопуос мерттылэм, тымет но лэсьтытэм. Егит мушкасьлэн ӵектэмезъя, нюлэс вӧзысь бусые чечы сётӥсь культураос кизьыны кутскиллям.
- Укмыстонэтӥ аръёсы улон огыр-бугыр луиз. Нимысьтыз предприятиос кылдылыны кутскизы. Фабрикаос, заводъёс но частникъёс кие выжизы. Гурт хозяйствоын нырысьсэ фермер хозяйствоос кылдӥзы. Соин мон но ас поннам ужаны малпай. Колхозын 8 ар ужам бере, 1993-тӥ арын, ужысь кошконо кариськи. Мон ужаны кутскыку колхоз пасекаын 13 йыр муш лыдъяське вал, нош кошкыкум – 100 йыр, - тодаз вае Флюр агай.
Флюр Михайлович нимысьтыз ужбергатӥсь луон сярысь но малпаськымтэ, фермер хозяйство но кылдытымтэ - аслаз садаз гинэ мушъёсты утялтэм.
- Вить йырысен кутски но куамын вить йырлы вуттӥ. Собере бакча бере пасека лэсьтыны кутски. Сизьым ар тырши кутскем уже бордын, - вера Флюр Михайлович. – Нырысь кык метръем кенер кутӥ. Собере котыраз пӧртэм писпуос мерттылыны кутски. Пӧлазы пирамидальной топольёс но вань. Нош пушказ улмопуос мерттылӥ, ачим прививать карылӥ. Малы ке но басьтэм улмопуос толалтэ кынмо вал. Али муш бакчаямы 40-лэсь трос улмопуос будо, тулыс сяськаенызы, сӥзьыл емышъёсынызы шумпотто. Мон та уж борды басьтӥськыку, гуртамы муш утисьёс туж ӧжыт вал. Али ини трос, мушъёс огъя 400 йырлы матэ лыдъясько, лэся.
Быръем ужзэ азинтонын Флюр Михайловичлэн кивоштӥсез но юрттӥсез луэм Алина кузпалыз, собере ини - нылпиосыз. Андрей пизы но Нэля нылзы пичиысен, пе, мушъёсын огкыл шедьтылӥллям. Артём пиезлы Флюр агай вордӥськем нуналаз мушъёсын уморто кузьмам. Озьы Артём но семьяезлэн ужаз кыстӥськем.
Туэ Калтасы ёрос сабантуйын йӧскалык коркаос, усточиослэн киужъёсынызы адӟытон радъямын вал. Со сяна, празднике вуэмъёс мушъёслэн сётэм продукциенызы но тодматскыны быгатӥзы. Соосты егит ужбергатӥсь, КФХ-ен кивалтӥсь Нэля Шаритдинова усто возьматӥз. Кылем арын БГУ-эз йылпумъям экономист-бухгалтер организацие яке предприятие интыяськыны дыртымтэ, люкам тодон-валанэныз атаезлэсь быръем удыссэ азьланьтыны мылкыд карем. Муш бакчаын Флюр Михайлович ке тырше, табыш поттон сярысь Нэля сюлмаське, кагаз ужъёсты но со нуэ. Туэ Шаритдиновъёс Нефтекамскын ларёк усьтӥллям угось.
- Туннэ нуналэ муш утён сярысь книгаос трос, интернет но ки улын. Соосын пайдаяськиськоды-а? – юасько Флюр Михайловичлэсь.
- Лыдӟисько. Кызьы, пе, сотэк? Мукет шаеръёсысь муш утисьёслэн ужан амалъёсынызы тунсыкъяськисько: кызьы утё, кыӵе луонлыкъёс кылдыто. Кылсярысь, финнъёслэсь ужамзэс интернет пыр учки. Верало одӥгзэ – книгаын гожъямъёсъя гинэ ужаны уг луы. Котькуд мушкасьлэн аслаз ужан амалэз, шуом, секретэз луэ, - валэктэ Флюр агай.
Шаритдиновъёс пӧртэм конкурсъёсы но, адӟытонъёсы но трос пол вуылӥллям ни. Соослэсь продукцизэс котьку паймыса, тунсыкъяськыса, пе, учко-эскеро.
Миляуша БУЛАТОВА.
Калтасы ёрос.
Оставить сообщение: