icon_gotop
18+
autorisation
Войти | Регистрация
Время в Татышле
18:57
Пятница, 29 Марта
Рекламный баннер 990x90px top

Быдэсмем малпанэ

10:13 21.07.2016

Эстонилэн шоркарез - Таллин

Вуи мон Таллинэ. Интыяськи Андрес Хейнапуу доры. Со нуналэ ик Андрес мыным экскурсия радъяз – городэтӥ ветлӥм. Таллин кык люкетъёслэсь сылэ - вуж город но выль город. Быдэс дуннеысь туристъёс татчы вуыло, вуж городэн тодматскон вылысь.

Сюбег ульчаос, аспӧртэм юртъёс, башняос, церковьёс… Соос шоры учкыса ветлонъяд, астэ выжыкылын кадь потӥськод. Тани-тани сэрег сьӧрысь азьло дауръёсысь рыцарь потоз кадь, киосазы мечъёсын ожгарчиос азяд султозы… Огдырлы аслэсьтыд кыӵе даурын улэмдэ ик вунэтоно: отысь но татысь вашкала дӥськутэн адямиосты адӟыны луэ, кин ке тонэ вузкарон интыяз пырыны ӧте, кин ке син-пель кузьымъёс тупатыса пуке…

Совето Союз вакытэ Таллинын выжыкылъёс пуктыны, кунгож сьӧрын улонэз возьматӥсь киноос уськытыны ярато, пе, вылэм. Таллин котьку Европа шӧмо луэменыз висъяськиз угось.

Россилэн мертэтъёсызъя, Эстонилэн шоркарез туж пичи. Таллинын улӥсез 400 сюрс сяна ӧвӧл. Ӵошатон понна: Уфаын но миллионлэсь трос калык лыдъяське. Ма, Эстония ачиз но бадӟым ӧвӧл, 45 сюрс 227 квадрат километр гинэ: 1 сюрс 520 иськем шормуӵсэ лыдъяса. Эстонъёслэн лыдзы, удмуртъёсын ӵошатыса, кык поллы тросгес. Эстонъёс туж зол дунъяло анай кылзэс, вашкалазэ, аспӧртэмлыкозэ туж гажало! Коркаоссы шоры учкыса но сое шӧдыны луэ. Юртъёс вуж пусъёсын, пужыосын, изъёсын чеберъямын. Котыр – чылк-чылк, сяськаос будо…

12-тӥ июне Maavalla Koda общинаысь ёзчиосын но Марий Элысь куноосын пумиськон ортчиз, кытын ми ог-огеными тодматским, куриськонэз кызьы радъяны кенешим. Отын Maavalla Koda общинаысь ёзчиос Андрес Хейнапуу, Калле Эллер, Мадис Иганом, Арви Сепп, Марий Элысь вӧсясьёс Алексей Чемеков, Эрик Юзыкайн луизы. «Финн-угор дунне лябомыны кутскиз, соин ӵошен кариськыса Быдӟым Инмарлы вазиськыны кулэ», - шуиз Калле Эллер.

Финляндия

Финляндиын луимы ньыль нунал. Ямсянкоскилэсь кыдёкын ик ӧвӧл Taivaanaula общинаен (кивалтӥсез Анси Альхонен) лагерь кылдытэмын вал, кытын вашкала дырысен интыяськемын священной интызы – бадӟым из. Со инты соослы туж дуно потэ, соос отчы ӵемысь люкаськыло, обществозылэсь малпам ужъёссэс эскеро, вуонолы ужпумъёс чаклало. Соосын вераськыны юрттӥз тодмо переводчик Арви Сепп.

Татын улытозямы ми тодматскимы интыысь фольклорен. Ветлӥмы Ямся городэ, кытын учкимы вашкала калыкъёслэсь оборонительной сооружениоссэс. Пырамы культурая двореце, учкимы интыысь художникъёслэсь выставказэс. Священной интыосы ветлӥмы. Общиназылэн валтӥсь ужпумез - вань священной интыосты картае пыртон. Тодматӥзы, кызьы но кыӵе мунчоос финнъёс лэсьтылӥллям. Соос мунчоез бадӟым макеен адӟо, малы ке шуоно мунчоын мисьтаськем сяна, отын етӥн но пенька куасьто, солод пӧзьто.

Финляндиын инбам улысь музейёс трос. Ми ветлӥм одӥгаз инбам улысь мунчо-музее. Со Ювяскюля городлэсь 25 иськеме огпала интыяськемын. Кызьы пусйизы, финнъёс ӵемысь та музее, пе, вуыло. Отын 30 мунчоос сыло, кудъёсыз быдэс странаысь ваемын. Адӟыны но пырыны луэ сюй пушкысь мунчое но, выжтыса нуллон мунчое но, палатка выллем мунчое но, бочка выллем мунчое но. Котькуд мунчо бордын – гожъямъёсын табличкаос.

Вӧсяськон нунал

Вуиз вӧсяськон нунал. Тани ми вӧсяськон интыын. Быдэсдунне конгрессысь делегатъёс вуэм бере, финн, эстон, удмурт, пор кылъёсын вӧсяськимы. Быдӟым Инмарлэсь дунне вылын тупаса улон, калыкъёс пӧлын ог-огдэ валан, тазалык но шудбур куримы. Ортчытэм ужрадмы ваньмылы кельшиз. Финнъёсын келяськыса, ми Таллинэ вырӟимы.

Туж бадӟым тау кылъёсме вераме потэ кунгож сьӧры вуылыны юрттэт возьматэм адямиослы, Ранус Садиковлы, Татьяна Миннияхметовалы, Анна Байдуллиналы.

                     Фридман КАБИПЯНОВ.

Татышлы ёросысь Бальзюга гурт.

6613

Оставить сообщение: