Ӟечбур, гуртэ – нуныяса будэтэм кӧкые

Кылем арняын Каймашабаш гуртооссэ пумитаз. Татын «Ӟечбур, гуртэ!» ужрад ортчиз. Пумиськонэ Янаул ёрос Кенешлэн секретарез Виль Нигмадзянов, ёрос администрациысь муниципальной контролья ёзэтэн кивалтӥсь Роберт Садыров, БР-ысь удмуртъёслэн НКЦ-енызы кивалтӥсьлэн воштӥсез Юрис Саитов, Иткинеево гурт поселенилэн администрациеныз кивалтӥсь Равит Шакуров пыриськизы. Ужрадэз ортчытыны коньдон юрттэт возьматӥзы Р. Бурунин, Р. Уракбаев но А. Муфтиев. 

Ужрадлэн нырысетӥ люкетэз гуртэн, ульчаосын тодматсконлы сӥземын вал. Куноос но удмурт дӥськутъёсын кышномуртъёс «Молодёжная», «Школьная», «Полевая», «Русская» урамъёстӥ ортчизы. Шулдыресь удмурт гуръёс та нуналэ ӧз ик чалмытске, шуыны луоз. Урамлы быдэ ческыт пӧръёсын ӝӧк дасямын вал: татын куноосты арганэн шудыса, эктыса но кырӟаса пумиталлязы. Менгалиевъёс, Камидуллинъёс, Садыровъёс, Пазиуллинъёс доры кожылӥмы. Ӝикыт, утялтэм, сяськаос пӧлы «выем» бакчаос, усто киосын тупатэм шутэтскон интыос – беседкаос, гужем коркаос котькинлы кемалы тодаз кыльымон луизы.

Озьы ик палэнэ ӧз кыле школа но нылпи сад. Туэ татысь школалы 120 ар тырме. Гуртысь дышетӥсь Земфира Ибраева гуртлэн историеныз пыр-поч тодматӥз. Одӥг юрт сярысь но со вератэк ӧз кыльы, шуыны луоз.

Ужрадлэн кыкетӥ люкетэз гуртлэн кылдэмезлы сӥзем постановкаысен кутскиз. Каймашабаше пыронтӥе дасям сцена вӧзы трос калык люкаськиз: таӵе шулдыр празднике Каймашабашын вордскыса будэм но туннэ нуналэ палэнын улӥсьёс но шумпотыса бертӥллям. Каймашабашъёсты ӟечкыланы бускель гуртъёсысь – Шудекысь но Можгаысь – куноос но вуиллям: удмурт фольклор ансамбльёсы ветлӥсьёс шулдыресь кырӟанъёссэс кузьмазы.

Гуртлэн историез – со семьялэн историез, шуо. Праздник гуртоосты огазеянлы сяна, гуртысь дано, учкымон адямиосты, адӟем карымон семьяосты данъянлы но сӥземын вал. Нырысь ик пусйизы пӧртэм удысъёсын тыршем но дано нимъёсты утэм ужысь ветеранъёсты: С. Исламов – БР-ысь гурт удысысь сӥё-дано ужась, вакытаз «колхоз-миллионер» нимез утэм «Волга» колхозэн кивалтэм, Б. Тимиркаева – парсь утёнын тыршемез понна «Знак Почёта» орденэн пусъемын, Г. Мардамшин – тодон-валан сётон удысысь отличник, Ю. Минниахметов – РФ-ысь дано нефтяник. Озьы ик дано ужасьёс пӧлын – Р. Гайтиев, В. Шайхутдинов.

Историез эскероно ке, Каймашабаш кык гуртъёслэсь сылэ. Калыкысь ӵем кылыны луэ «ӟучпал» но «удмуртпал» шуэмзэс. Туннэ нуналэ гуртын ӟучъёс пӧлысь Люба Мерзлякова – Садиахметова улэ. Анай-атай юртсэ утьыса возись кышномуртэ но праздникын синпель кузьымен пусйизы.

Улон интыяз уг сылы. Гурт но воштӥське, урамъёсын выль юртъёс ӝужало. Праздниклэсь азьвыл гуртын «Образцовый дом», «Лучший двор» конкурсъёс радъяськиллям, котькуд урамысь чебересь коркаосты, учкымон юртъеръёсты бырйиллям. Нырысетӥ конкурсын вормисьёс луиллям Кутлияровъёс, Садриевъёс, Партиевъёс, Салимовъёс, Камидуллинъёс, Валиуллинъёс, Гараевъёс, нош кыкетӥ конкурсын - Исламгараевъёс, Паркышевъёс, Мингалиевъёс, Камидуллинъёс, Алетдиновъёс, Башировъёс, Пазиуллинъёс но Мардановъёс. Соосты но ужрадын данъязы. Алигес выль корка улыны выжем семьяосты но пусйизы. Нылпи юртысь пинал басьтэм семьяос но палэнэ ӧз кыле. Сцена вылэ ӧтизы Абдиевъёсты, Давлетовъёсты, Пазиуллинъёсты, Паркышевъёсты.

Тупаса, кенешыса улӥсь кузпалъёс шоры котьку синмаськыса учконо: кыштыр гинэ ваче ки улонзэс азьланьто, огзылы огзы пыкет луо. Ужрадын Пазиуллинъёсты бриллиант сюанэнызы, Галиахметовъёсты зарни сюанэнызы, Тимираевъёсты рубин сюанэнызы, Нургалиевъёсты, Тимирзяновъёсты, Пазиуллинъёсты жемчуг сюанэнызы, Багдановъёсты но Садиевъёсты пияла сюанэнызы ӟечкылазы.

Та нуналэ Каймашабашын крезьгуръёс кема чузъяськизы. Ужрадэ вуэмъёслы задор эктонъёссэс, шулдыресь кырӟанъёссэс кузьмазы школаын дышетскисьёс, культура юртын ужасьёс, гуртысь фольклор ансамбле ветлӥсьёс но лыктэм куноос. Ӵуказеяз гуртоосты Ыштӥяк вӧсь огазеяз. Вӧсясьёс калыклы каньыл улон, тазалык но шудбур курыса Инмар-кылчинлы вазиськизы.

   Миляуша НИГАМАТУЛЛИНА.