Жингрес куараоссы кунгож сьӧрын но чузъяськизы

Юбилейлы сӥзем ужрадэз «Отӥ но лыктэ туганэ»  крезьгурез курайен но баянэн шудыса усьтӥзы. Тани сцена вылын уӵы нылъёс воректӥзы. Соосты ӟечкыланы кыл сётӥськиз ансамблез кылдытӥсьлы но соин кивалтӥсьлы Фанил Нуриахметовлы. Дуно куноосты пумитаса вазиськемез бере, Фанил Нурисламович вакчияк ансамбльлэн кылдэменыз тодматӥз. Солэн кылъёсысьтыз тодӥмы: 1996-тӥ арын кылдэм «Уӵы ныл» ансамбле нырысь «Фанга» колхозын тыршись дас песянайёс но кышномуртъёс пыриськиллям. Нош берло ансамбле ветлӥсьёслэн лыдзы арысь аре будэм. Туннэ нуналэ соос 16-лы вуиллям ни. Жаляса верано, ансамбле пыриськись куд-ог  песянайёс улэпесь ӧвӧл ни. Соос пӧлын Фаузия Кунакбаева, Фанида Камалтдинова но Ямига Шарафутдинова. Соосты буре вайыса одӥг минут чус сылӥм. «Уӵы ныл» ансамбльын трос аръёс ӵоже кырӟазы-эктӥзы Анастасия но Нурислам Нуриахметовъёс, Камила Хатипова. Жаляса верано, тазалыксы лябомемен соос туннэ калыкез шулдыртыны уг быгато ни. 

Туннэ нуналэ калык кырӟанъёсты но фольклорез яратӥсь коллективе пӧртэм арлыдо кышномуртъёс пырисько. Соосты крезьгурен шулдыртэ Данил Камалтдинов. Фанил Нурисламович коллективез ӟечкыласа, уӵы нылъёсты нимысьтыз кузьымъёсын данъяз. 

Уӵы нылъёсты котырес лыдпусэн ӟечкыланы вуизы Кальтяй гурт поселенилэн администрациеныз кивалтӥсь Радик Гарипов, «Колос» ООО-ысь бригадир Фанис Валинуров, Татышлы ёрос администрацилэн представителез  Владимир Марданов, Татышлы ёросысь Культурая управлениен кивалтӥсь Альфия Шайнурова, Вылысь Татышлыысь поселениос куспысь культурая но шутэтсконъя центрен кивалтӥсь Фигат Зиннуров. Соос котькудзы коллективез ӟечкыласа тау карон гожтэтъёс но синпель кузьымъёс сётӥзы. «Ансамблез тросэз тодо. Кытчы гинэ со ӧз вуылы ни. Котькуд ужрадысь вормонэн, кузьымен берытске», - вераз Радик Накиевич. Со сяна, Альфия Ураловна ансамбльысь котькуд кырӟасез но соослэсь кивалтӥсьсэс нимысьтыз тау карон гожтэтэн пусйиз на.

Башкортостанын улӥсь удмуртъёслэсь ӟечкыланзэс вуттӥз БР-ысь культура удысысь сӥё-дано ужась, БР-ысь удмуртъёслэн НКЦ-енызы кивалтӥсь, «Ошмес» газетлэн валтӥсь редакторез Салимьян Гарифуллин. «Уӵы ныл» та сцена вылысен кырӟаны-эктыны кутскыса Эстониозь вуиз. Отын со Башкортостанэз гинэ ӧз, быдэс Россиысь удмуртъёсты возьматӥз», - вераз со. Со сяна, Салимьян Гарифуллинович Кызыл-Ярысь «Марӟан» ансамбльлэсь но кузьымзэ вуттӥз.

Уӵыкайёсты ӟечкыланы вуизы на Россиысь удмурт диаспораосын ужанъя координатор Ф. А. Чибышева, БР-ысь удмуртъёслэн НКЦ-енызы кивалтӥсьлэн воштӥсез Ю. С. Саитов, БР-ысь удмуртъёслэн НКЦ-зылэн Кенешезлэн секретарез Т. Н. Шайбакова, гуртысь ужбергатӥсь, БР-ысь удмуртъёслэн НКЦ-енызы кивалтӥсьлэн воштӥсез Д. М. Биктимиров. Пермь шаерысь удмуртъёслэн национально-культурной центренызы кивалтӥсьлэсь Станислав Гадиятовлэсь ӟечкылан гожтэтсэ вуттӥз Куеда ёросысь Кирга гуртысь «Уӵы» ансамбль.  

Уӵы нылъёс доры шумпотыса вуизы Татышлы ёросысь Выль Татышлыысь «Шулдыр ӝыт», Улысь Балтачысь «Ӧрӟи», Калмиярысь «Инвожо», Янаул ёросысь Вуж Варяшысь «Югдон», Барабановкаысь «Азвесь гур», Свердловск улосвылысь Дегтярскысь «Италмас», Удмурт Элькунысь Ижкарысь «Ӟаныкай» удмурт ансамбльёс. Шулдыр кырӟанзэс кузьмазы на уӵы куараё кырӟасьёс Вылысь Татышлыысь Светлана Нурлыгаянова, Вязовкаысь Альфира Гарифуллина, Радис Гайниятов, Выль Татышлыысь Марина Низамова, Бальзюгаысь Фридман Кабипянов, Вязовкаын будэм но али дыре Удмурт Элькунысь Шаркан ёросын улӥсь Надежда Максимова. Ижкарысь Александр Минниахметов ужрадэз кураен шудыса шулдыртӥз. Нош Вязовкаын вордӥськем но али дыре Первоуральскын улӥсь Рифат Шаймарданов тунсыко фокусъёсыныз синъёсты пӧртмаз.

«Уӵы ныл» ансамбль песянай-песятайёсмылэсь вашкала кырӟанъёссэс, жингыртӥсь крезьгуръёссэс, сям-йылолъёссэс азинтэ. Та нуналэ но соос «Армие келян», «Быдӟымнал» йылолъёсты возьматӥзы. Озьы соос асьмелэсь, удмурт калыкмылэсь, азьвыл дырысен утиськем узырлыксэ утё но будӥсь нылпиослы пыӵатыны тыршо.

Марина НИКОЛАЕВА.

Татышлы ёрос.